Питрәч районында махсус операциядә катнашучыларга багышланган чаңгы ярышлары узды

Районда беренче тапкыр махсус операциядә катнашучыларга багышланган чаңгы ярышлары узды. Ленино-Кокушкино мәктәбенең яшь спортчылары уку йорты бинасыннан старт алдылар һәм Питрәчтә финишка килеп җиттеләр, анда Җиңү паркында һәлак булганнар һәйкәленә чәчәкләр салдылар.

“Хәтер чаңгы юлы” катнашучыларны яшьләр үзәге янында бергә җыйды, анда һәлак булган биш авылдаш хәрби хезмәткәрне искә алуга багышланган тантаналы митинг узды. Укучылар аларның исемнәре язылган һәм фотолары урнаштырылган плакатларны кулларына тотып бер рәткә тезелеп бастылар. Һәлак булган якташларын авыл халкы да искә алды. Җыелганнарга мөрәҗәгать итеп, район башлыгы Илһам Кашапов һәлак булган сугышчыларның әти-әниләренә үз Ватанының чын патриотларын тәрбияләгәннәре өчен рәхмәт сүзләрен җиткерде.

– Андый геройлар булганда, илебез җиңелмәячәк, аларның исемнәре мәңгегә район тарихы елъязмасына язылган! – диде ул.

Районның көмеш волонтерларына да сүз бирделәр, алар көчләрен дә, вакытларын да кызганмыйча җиңүгә үз өлешләрен кертәләр: маскировка челтәрләре үрәләр, окоп шәмнәре ясыйлар. Аннары чарада катнашучылар һәлак булганнар һәйкәленә гирлянда һәм чәчәкләр салдылар. Стартка тренер, физкультура укытучысы Алексей Чукуровның унөч тәрбияләнүчесе чыкты.

– Без башта кырда булачак трассаны карап, тикшереп чыктык. Алда безгә кар автомобиле юл салачак, ә без бер-беребез артыннан барачакбыз, – дип сөйләде Алексей Иванович.

Соңгы факт аеруча актуаль, чөнки катнашучылар арасында ике өлкән буын вәкиле дә бар. Икесе дә Пановкадан. Аларның берсе Искәндәр Фәсхетдиновка шушы көннәрдә җитмеш яшь тула.

– Мин бу вакыйгадан читтә кала алмадым. Бүген улым махсус хәрби операция зонасында хезмәт итә. Мин аңа һәм аның иптәшләренә булдыра алганча ярдәм итәргә тырышам, – дип аңлата ветеран.

Ветеран болай да тормышта актив кеше була, ә улы махсус хәрби операция зонасына киткәч, бөтен эшчәнлеген җиңүгә өлеш кертүгә юнәлтә. Ул солдатларга җибәрер өчен маскировка челтәрләре үрә, окоп шәмнәре ясый.

Чаңгы ярышында катнашучылар унике километрга якын юл үттеләр. Соңгы пункт Хәтер паркы, анда һәлак булганнар һәйкәленә чәчәкләр салдылар.