Питрәч хоккее: рәттән өченче җиңү яуладылар
Ирләр командалары арасында ЛХЛ Чемпионатының беренче әйләнеше тәмамланды, анда төп приз өчен 12 команда уйный.
Соңгы турда "Пестрецы" командасы Байлар Сабасында җирле "Тимерхан" командасы белән уйнады һәм 4:2 исәбенә җиңү яулады. Безнекеләрдән алкаларны Сабир Янов, Игорь Сорокин, Артем Мурашов һәм Данил Воркунов кертте.
Бу җиңүдән соң Питрәч командасының исәбендә 11 очко, хәзер беренче әйләнештән соң безнең хоккейчылар алтынчы урынны били. Тик лидерларга кадәр ерак әле - "Гагарин" һәм КГАСУның исәбендә 18әр очко.
- Без Яңа ел каникулларына яхшы кәеф белән китәргә теләдек, - ди турнирның иң яхшы бомбардирларының берсе, һөҗүмче Сабир Янов. - Бердәм рухта уйнадык, азрак хаталар җибәрергә тырыштык, күбрәк очко җыеп, турнир таблицасында югарырак күтәрелергә теләдек. Форсаттан файдаланып, команда исеменнән һәркемне якынлашып килүче Яңа ел белән котлыйм һәм уңышлар телим.
Киләсе матч 10 гыйнварда Казанда КГАСУ командасы белән узачак, ә үз бозында питрәчлеләр 19 гыйнварда "Норма" (Казан) командасы белән уйнаячак.
Следите за самым важным и интересным в Telegram-каналеТатмедиа
