Питрәч хоккейчылары кумирлары белән очраштылар

Танылган хоккейчы, 2011 елда яшьләр командалары арасында дөнья чемпионы, “Локомотив” клубының сакчысы Андрей Сергеев “ПитрәчАрена” боз сараендагы яшь спортчылар өчен мастер-класс үткәрде. Яшь хоккейчыларның чираттагы тренировкаларының берсе сигез яшьлек малайлар өчен чын вакыйгага әверелде: бозда алар белән Россия хоккейчысы, “Локомотив” клубының сакчысы Андрей Сергеев шөгыльләнде. Соңрак балалар әйтүенчә, ул аларның барысы өчен дә кумир. Ә тренировкалар башланганчы Андрей Николаевич бер сәгать буе булачак чемпионнар белән аралашты. Аның кебек ничек профессионал булырга, дигән сорауларның берсенә Андрей Сергеев: “Вакыт үткәрер өчен генә түгел, ә алга таба уңышларга ирешү өчен ныклап шөгыльләнергә кирәк”, – диде. Аны безгә Питрәчкә 2015 елда туган хоккейчылар командасы тренеры Илшат Исхаков чакырган. Алар спорт юлын бергә башлаганнар, Түбән Камада уйнаганнар.

– Мин аннан безгә килеп, малайларга ярдәм итүен сорадым, – дип сөйләде тренер. – Ул ризалашты. Бу аларның кәефләрен күтәрер, биеклекләргә омтылу теләген уятыр, дип өметләнәм.

Яшь хоккейчылар исә танылган хоккейчы белән очрашуларына ничек шатлануларын яшереп кала алмадылар. Алар: “Без аның фанатлары!” – дип кычкырдылар, һәм аларның кумиры форма киемендә калдырган автографны күрсәттеләр. “Пестрецы-2015” хоккей командасы сакчысы Владимир Пушков сүзләренчә, ул аның кумиры, шуңа күрә бу очрашуга бик шат.

– Минем “Локомотив” клубы майкасы бар! – диде горурланып малай. – Мин бирегә балалар белән вакыт үткәрергә, аларны кайбер алымнарга, техникаларны өйрәтергә, берничә күнегү ясарга, шулай ук уйнарга килдем, – дип уртаклашты Андрей Николаевич.

Хоккейчы ялда булганлыктан, ул хатыны һәм кызлары белән килгән. Алар, яшь хоккейчыларыбызның әти-әниләре кебек үк, гадәти булмаган күнегүләр барышын кызыксынып күзәттеләр.

Бу очрашудан истәлек итеп Андрей Сергеев командага үзенең автографы белән ике футболка бүләк итте.