Питрәч. Футбол. Лидер беренче җиңелүгә дучар булды

Лидер "Виктория" узган ел чемпионы "Олимп" белән очрашты. Әлеге мавыктыргыч уен киеренке көрәштә узды. Шулай да, чемпион лидердан көчлерәк булып чыкты, ул 5:4 исәбендә җиңде. Шул рәвешле, "Виктория" бу сезонда беренче җиңелүгә дучар булды. 12 уеннан соң, аларның исәбендә 33 очко. "Легион"ны 5:2 исәбе белән җиңгән "Аякс" командасы да шулкадәр очкога ия, тик алар 13 уен үткәрделәр.
"Арсенал" да "Титан" командасын шундый ук исәптә җиңеп һәм 27 очко җыеп, өченче урында калды. "Олимп" алардан бер очкога калыша. Әлеге командалар шулай ук 13әр уен үткәрделәр.
Чемпионатның аутсайдеры беренче җиңүеннән соң, кабат җиңелүгә дучар булды, бу юлы аларны 12:0 исәбе белән "Скиф" тар-мар итте. "Триумф" бу турда "Аврора"ны - 7:2 исәбе белән отты.
Бомбардирлар арасында кабат ике лидер – Николай Парфёнов («Титан») - 29+8 һәм Виталий Филиппов («Триумф») – 25+12, алар 37шәр балл җыйдылар. Алардан бер баллга гына Артем Утяганов калыша. («Виктория») – 26+12.
14 тур уеннары бүген, 28 августта башланды.