Дүртенче декабрьдә барлык православие чиркәүләрендә Изге Кыз Мариянең чиркәүгә китерелүе бәйрәм ителә.
Бу бәйрәм зур бәйрәмнәр исемлегенә кертелгән. Бу бәйрәмдә Изге Кыз Мариянең чисталыгы күрсәтелгән һәм безгә дә үгет итеп бирелгән.
Чиркәү язуы безгә шуны хәбәр итә: "Мариянең әти-әнисе, әгәр дә балалары туса, аны Ходайга тапшырасыларын әйтеп", - сүз биргән вәгъдәләрен бозмыйча, Мариягә өч яшь тулгач, Иерусалимдәге чиркәүгә тәрбиягә тапшыралар.
Кыз Марияне, иптәшләре, туганнары, кулларына шәмнәр тотып, псаломнар җырлап, чиркәүгә озата баралар. Иерусалимдә бу чиркәү бердән-бер һәм иң зур, дип саналган. Аның ишек төбенә менеп җитәргә нәни Мариягә 15 зур һәм киң баскычтан атлап менәргә туры килгән. Иң беренче баскычка әти-әнисе бастыра. Өч яшьлек Мария әкрен генә чиркәү ишеге төбенә менеп баса. Анда Аны беренче священник каршы алып бәхилли һәм изгедән-изге дигән бүлмәгә кертә. Бу бүлмәгә беренче священниктан башка берәү дә керергә тиеш булмый. Аңа да елга бер генә мәртәбә керергә рөхсәт ителгән. Чиркәүдә Мария изге китаплар укып, кул эшләренә өйрәнеп, христиан тормышын тотып яшәргә тәрбияләнеп үсә, Ходайдан куелган боерыкларны өйрәнеп, 11 яшенә кадәр чиркәүдә яши. Һәрвакытта чиста тормыш белән яшәр өчен Аны фәрештәләр саклап йөртә һәм Мария Ходай каршында чиста көе торасын әйтеп, сүз бирә.
Мариянең әти-әнисенең бу эше, барыбыз өчен дә бик зур үгет итеп бирелгән. Чөнки чын христианнар үзләренең балаларында да Ходайны белү, Аны ярату хисен кечкенәдән үк уятырга тиеш. Балаларга чиркәү юлын күрсәтү, кылган җазыкларын кичертергә өйрәтү ата-ана өстендә тора түгелме?
Бу көнне Православие чиркәүләре безне, балаларыбыз белән бергә тәрбиягә өйрәнү бәйрәменә чакыра.
Иң мөһим һәм кызыклы язмаларны Татмедиа Telegram-каналында укыгыз
