Богородское авылында яңа башкарма комитет бинасы ачылды

Богородское авылында муниципалитетлар инфраструктурасын үстерү буенча республика программасы кысаларында төзелгән җирле хакимиятнең яңа бинасын ачу тантанасы булды. Элегрәк башкарма комитет хезмәткәрләре мәктәп подвалында, аннары мәдәният йортында урнашкан булганнар, хәзер исә алар 91 кв. метр мәйданлы заманча бинада урын алдылар. Биредә җирлек башлыгы, биш хезмәткәр һәм хәрби-исәп өстәле урнашачак.  

Яңа бинада халыкны кабул итү өчен иркен кабинетлар, янгын куркынычсызлыгы системасы булган аерым архив бүлмәсе, хәрби-исәп өстәле өчен махсус бүлмә, шулай ук аз хәрәкәтләнүче гражданнар өчен пандус һәм бәдрәф бар. Планда – кондиционерлар, телевизор урнаштыру һәм янәшәдәге территорияне төзекләндерү.

«Бу бөтен җирлек өчен бүләк», — дип белдерде ачылу тантанасында Питрәч районы башлыгы Рәис Сөләйманов. «ТР Муниципаль берәмлекләре Советы» Ассоциациясе рәисе Әгъзам Гобәйдуллин: «Богородское авылының тарихы бай, ә хәзер аның заманча инфраструктурасы да бар», - дип өстәде.  

Җирлек башлыгы Дмитрий Булыгин билгеләп үткәнчә, яңа бина җирле үзидарә үсешендә мөһим адым булачак. Авыл халкы бу вакыйгадан соң башка үзгәрешләр дә булыр дип өметләнә — мисал өчен, йортларны ремонтлау, балалар өчен футбол стадионы төзү. Хакимият бинасы ачылышы ТР Дәүләт Советына сайлауларга әзерлек белән туры килде, җирле хакимият органнарын үстерүнең мөһимлеген ассызыклады.  

Төзелеш 11 миллион сумга төшкән һәм нибары 2 ай вакыт алган. Хәзер инде озак вакыт кыен шартларда эшләгән авыл администрациясе авыл үзәгендә лаеклы заманча бина алды.