Питрәчтә “Аҗаган” хәрби-патриотик уены узды

Фото: © Валерий Мирошников / «Питрәч-информ»

Питрәчнең “Мишә” спорт комплексында “Аҗаган” хәрби-патриотик уенының муниципаль этабы узды Анда 11 команда катнашты, алар хәрби-гамәли спорт төрләрендә ярыштылар.

Питрәч беренче мәктәбенең Ватанны саклау һәм иминлек нигезләре укытучысы Сергей Максимов ярышларның баш хөкемдары булды:

– Соңгы елларда патриотизм мәсьәләләренә зур игътибар бирелә. Өстәвенә, Ватанны саклаучылар елында бу эш мәктәпләрдә һәм тормышта бик кирәк, һәм без аны дәвам итәчәкбез. “Аҗаган”да район мәктәпләреннән командалар катнаша. Нәтиҗәләр буенча без кубок белән бүләкләнәчәк иң яхшы команданы ачыклыйбыз.

Балалар стройга әзерлек, Калашников автоматын сүтеп җыю, автомат магазинын кору, медицина әзерлеге, саклану чаралары – противогаз һәм химик саклану костюмы кию, көч әзерлеге, хәрби-спорт эстафетасы, пневматик винтовкадан ату, граната ыргыту буенча ярыштылар.

Колай мәктәбеннән сигезенче сыйныф укучысы Есения Глянцева медицина әзерлегендә манекенда йөрәккә массаж ясап күрсәтте:

– Мин мондый чараларга алтынчы сыйныфтан йөрим, монда бик ошый. Биремне җиңел үтим, чөнки укытучы безгә бу турыда сөйли, без төрле тренировкалар узабыз. Безнең отряд даими рәвештә команда белән дә, аерым да урыннар алып тора. Без җиңүгә әзер.

Катнашучылар шулай ук медицина ярдәме күрсәтүгә кагылышлы техник сорауларга җавап бирделәр – умыртка сөяге, оча сөяге сынганда нәрсә эшләргә кирәк. Бу белем сугыш шартларында гына түгел, көнкүрештә, ялда, юлтранспорт һәлакәтләрендә дә кирәк булачак.

СВОда катнашучы Юрий Л. уенда мактаулы кунак сыйфатында катнашты:

– Яшьләр белән шөгыльләнүче кешеләр барлыгын күрү сөендерә. Мин СССРда тудым, бездә патриотизм тәрбияләү даими булды. Ватанны саклаучылар көне алдыннан шуны билгеләп үтәм, алгы сызыкта булганда бу бәйрәмгә карашым үзгәрде. Бу – мәңгелек бәйрәм, бөек бәйрәм.

Строевой смотрда үз Ватаннары өчен горурлык хисе һәм аны яклау теләге сизелде, анда командалар строевой адымнар белән йөрделәр, строевой җырлар да башкардылар.

Камилла Шаһиәхмәтова Иске Шигали мәктәбенең алтынчы сыйныфында укый һәм инде өч ел, апасы Саимә артыннан, “Форпост” хәрәкәтендә катнаша:

– Бүген мин беренче тапкыр иреклеләр командасы командиры ролендә чыгыш ясадым. Бик дулкынландым, әмма безнең команда белән барысын да эшләргә була – барысы да бердәм, барысын да аңлыйлар, һәрвакыт ярдәм итәләр. Тренировка вакытында шундый кечкенә кыз, шундый озын буйлылар белән командалык итә, дип көлсәләр дә, нәтиҗәдә без барысын да бик яхшы башкарып чыктык.

Яңартылган “Аҗаган” уены катнашучылар һәм педагогларның күңеленә хуш килде, ярыш һәм уен формасында ул укучыларда патриотизм тәрбияли һәм кирәкле күнекмәләр белән таныштыра.

Уен нәтиҗәләре буенча беренче урынны Россия Герое Иван Додосов исемендәге Питрәч 1 нче мәктәбе алды, икенче урынны – Питрәч 2 нче мәктәбе, өченче урынны Советлар Союзы Герое Галимҗан Камалиев исемендәге “Прогресс” күп профильле лицее алды.