Юбилей турниры яңа чемпионнарны ачыклады

Кызганыч, быелгы турнир күрше районның гына түгел, безнең районның да иң көчле көрәшчеләрен җыя алмады. Моның сәбәпләре төрле иде, беренчедән, шушы ук көннәрдә Зәйдә билбау көрәше буенча чемпионат һәм башка чаралар үткәрелде.
Шулай да, оештыручылар командалар һәм катнашучылар күбрәк булыр дип көтте. Кызганыч, ир-атлар арасында бары тик дүрт кенә, ә яшүсмерләр арасында алты команда катнашты, бишесе – Питрәчтән, берсе – Казанның Мәскәү районыннан. Биш район командасының өчесен район үзәге тәкъдим итте, торак пунктлардан бары тик шәлелеләр һәм ленинококушкинолылар гына килде.
Авылларда инде үз кулларында билбау тота алган һәм көрәшә белгән яшь кешеләр калмаган дип уйлыйсы кала, яисә көрәш белән кызыксынучанлык кимидер...
Моңа карамастан, турнир яхшы дәрәҗәдә үтте, келәмгә чыгучылар кызыклы, мавыктыргыч көрәш күрсәттеләр. Аларның барысы да әзерләнеп килгән иде, ә оештыручылар, ярышлар яхшы узсын өчен һәрвакыттагыча тырыштылар.Тантаналы ачылыш вакытында спортчыларны район яшьләр эшләре һәм спорт бүлеге башлыгы Рафил Нурмөхәммәтов, безнең иң данлыклы көрәшчебез Иван Баширов, “Ак барс-Питрәч” ҖЧҖнең генераль директоры Марсель Габдрахманов һәм башкалар сәламләде. Ул Иван Алексеевичны 82 яшьлеге белән котлады һәм истәлекле бүләк тапшырды.
Чыгыш ясаучылар үзләре көрәшчеләргә мавыктыргыч көрәшләр, келәмнәрдә генә түгел, тормышта да җиңүләр һәм уңышлар теләде.
Алардан тыш, традиция буенча, турнирга безнең башка көрәшче ветераннар да килде, җанатарлар исә мавыктыргыч көрәш карарга өметләнде.
- Мондый турнирларны инде сагынырга өлгердек, мин бик теләп көрәш карыйм, бигрәк тә малайлар сөендерә, - ди көрәш яратучыларның берсе, спортчы һәм Әлбәдендә Сабантуй оештыручыларның берсе Григорий Мураткин.
Яшүсмерләр өч авырлык һәм өч яшь категориясендә көрәштеләр.
2003-2005 елгы яшүсмерләр арасында җиңүчеләр булып: Денис Волков (50 килограммга кадәр, икенче мәктәп), Ислам Шәйдуллин (60 килограммга кадәр, Казан), Булат Илмәтов (60 килограммнан артык, икенче мәктәп), Ярослав Лывин (30 килограммга кадәр, Ленино-Кокушкино), Инсаф Ногманов (40 килограммга кадәр), Ильяс Гарипов (40 килограммнан артык, икесе дә Казаннан).
Гомумкоманда исәбендә беренче урында Ленино-Кокушкино, икенчедә – икенче мәктәп, өченчедә – коррекцион интернат-мәктәп, дүртенчедә – Шәле, бишенчедә – беренче мәктәп. Казанлылар зачеттан тыш чыгыш ясадылар.
- Мин көрәш белән күптән түгел шөгыльләнә башладым, - ди турнирның яшь җиңүчесе Ярослав Лывин, - бүген беренче тапкыр мондый турнирда чыгыш ясадым, җиңүемә шатмын, бу миңа башка турнирларда ышаныч бирәчәк.
Ир-атлар арасында җиңүчеләр булып: Рамил Ильясов (65 килограммга кадәр), Айнур Бикчәнтәев (75 килограммга кадәр, икесе дә Күннән), Марат Сафин (90 килограммга кадәр, Шәле), Фәнис Шәмсетдинов (90 килограммнан артык, “Ак Барс” кошчылык комплексы).
Гомумкоманда зачетында беренче урында “Ак Барс Питрәч” ҖЧҖ, икенчедә – Күн, өченчедә – “Ак Барс” кошчылык комплексы һәм дүртенчедә – Шәле.
Барлык призерлар оештыручылардан истәлекле бүләкләр алдылар.