Балаларыбыз инсафлы булып үсә

Бәйге 9 яшьтән 16 яшькә кадәрге балалар арасында алып барылды. Ислам дине нигезләрен авылларындагы мәчетләргә йөреп өйрәнүче инсафлы балалар Коръән аятьләрен, сүрәләрен белүдә ярышты. Районның иң зур мәхәлләләре Шәле, Питрәч, Ленино-Кокушкино, Татар Тау Иленнән килгән балаларның Коръәнне тәҗвид белән карап укуына, яттан һәм мәкам белән укуына, мөселманча дөрес киенүенә, әхлак тәртибенә игьтибар ителде. Шулай ук Ислам дине нигезләренә бәйле белемнәре дә тикшерелде. Аларга төрле сораулар бирелде. Бәйгедә катнашучыларны мөгаллимәләрнең тырышып өйрәткәннәре күренеп тора. Һәм шуның нәтиҗәсе буларак, катнашучылар лаеклы урыннар алды. Яшь категорияләренә карап, урыннар түбәндәгечә билгеләнде: 7-11 яшькә кадәргеләр арасында 1 нче урын Шәледән Данис Мөхәммәтҗанов, 2 нче урын Татар Тау Иленнән Алинә Рәхимова, 3 нче урын Ленино-Кокушкинодан Илнур Зиннәтовка бирелде. 12-14 яшькә кадәргеләр арасында 1 нче ике урын Шәле балаларына бирелә. Болар: Илназ Галиуллин, Гөлшат Кашапова, 3 нче урында Питрәчтән Алисә Бикчәнтәева. 15-16 яшьлекләр арасында барлык урыннарны да Шәле балалары яулап алды. Болар: Раил Зарипов, Алмаз Нуриев, Илсаф Газизуллин. Шәле мәхәлләсе бик тырышкан. Афәрин! 1 нче урын ияләренә электрон Коръән бүләк ителде. 2 нче урын алганга - цифрлы фотоаппарат. 3 нче урынга - 2 симкалы кесә телефоны.
Шунысын да әйтергә кирәк, бәйгенең иганәчесе изге күңелле Илнур Наил улы. Мөхтәсибәт аңа олы рәхмәтен җиткерә.
- Киләсе елга да шушындый бәйге үткәрергә исәп тотабыз, - диде район имам-мөхтәсибе Мансур хәзрәт Исмәгыйль. - Балалар әзерләнә торсын, мәхәлләләр шул уңайдан күбрәк тырышсын иде, - дип тә өстәп куйды ул.
Рәсемдә: бәйгедә катнашучы балалар һәм мөгаллимәләр.
Мансур хәзрәт Исмәгыйль фотосы