Быел тагын килделәр
Үткән җомга һәм якшәмбе көннәрендә Мишә буе гөҗ килде. Монда су дистанцияләрендә спорт туризмы буенча Татарстан чемпионаты уздырылды. Питрәч район үзәгендә Мишә күпере турысында күпсанлы палаткалар пәйда булды. Биредә Чабаксар, Йошкар-Ола, Самара, Яшел Үзән, Саратов, Тольятти, Түбән Новгород һәм башка төбәкләрдән 100гә якын турист җыелган иде.
Шуны да әйтергә кирәк, Мишә буенда әлеге спорт төре белән мавыгучылар менә инде 15 елга якын җыелыша. Район үзәгендә яшәүчеләр, үтеп-сүтеп йөрүчеләр палаткаларга, көймәләргә, мондагы кешеләргә гаҗәпләнеп туймый.
- Ничек курыкмый икән болар шушындый салкын суга кереп йөрергә, әле ул гына түгел, ярышырга, - ди Зөлфия ханым. - Без Мишә буена да төшәргә куркып торабыз, вакыт та җиткерә алмыйбыз.
Әйе. Җитезләргә, өлгерләргә, кыюларга Мишәнең ярсу ташкыннары берни түгел. Алар махсус киемнәр киеп, елга баскычлары буйлап "сикерә". Бу тамашаны карарга бала-чага да, яшь җилкенчәк тә төшә. Минем оныгым да карарга ярата аларны. Ел саен ук булмаса да, төшкәлибез су буена.
- Мишәнең Питрәчтәге шушы өлеше - бик уникаль. Баскычлы-баскычлы, таулы яклардагы шикелле, шарлавыклы, көчле агымлы, тирән су әлеге спорт төре өчен менә дигән шартлар тудыра, - ди чемпионатны оештыручы, Татарстанның спорт туризмы федерациясе рәисе Илгизәр Хәйруллин.
Шулай шул, мондый спорт өчен иң уңайлы урын Татарстанда гына түгел, Идел буе төбәгендә бүтән юк. Тикмәгә генә чемпионат 15 ел буе Питрәчтә узмый.
Следите за самым важным и интересным в Telegram-каналеТатмедиа
