Андрей Филиппов Питрәчтән. Кече яшьтән үк машина йөртүче булырга хыялланган.
Ул гомере буе ашыгыч ярдәм шоферы булып эшләгән әтисе Николай Ивановичның эшен дәвам итүче.
- Мәктәптән соң мин СПТУ-93тә шоферлыкка укыдым. Аннан берничә ел дәвамында автотранспорт хуҗалыгында ГАЗ-53 шоферы булып эшләдем. Аннары район үзәк хастаханәсенә хуҗалык машинасы йөртүче булып эшкә урнаштым. Ашыгыч ярдәм машинасы руленә 11 ел элек күчтем, - ди Андрей. -Безнең эш җиңел түгел. Кайчагында смена эчендә ял итәргә дә вакыт юк. Бөтен район буенча йөрибез. Кайчагында Казанга барабыз - авыручыларны хастаханәгә илтәбез. Әмма барысына да күнегәсең. Өстәвенә, без игелекле хезмәт башкарабыз, - дип билгеләп үтте ул.
Андрей Филиппов кына түгел, ә аның бөтен гаиләсе һөнәре буенча медицина белән бәйле. Әнисе Наталья Ивановна бала тудыру йортында акушерка булып эшләгән. Хатыны Лилия – район үзәк хастаханәсендә баш бухгалтер, элек бу вазыйфаны аның әнисе Фәридә Василова башкарган. Олы кызлары Карина хастаханәдә табиб-терапевт, ә кече кызлары Алинә - статист булып эшли.