Күк йөзебезнең аяз булуында тыл хезмәтчәннәренең дә өлеше зур.
Без бүген аларның түземлелекләре, сабырлыклары, батырлыклары алдында баш иябез. Тол калган әбиләребез, ятим үскән сабыйлар язмышы кабатланмасын иде дип телибез. Мин, сугыш вакытында тылда хезмәт иткән карт әбием турында язарга телим. Карт әбием Хужина (Абдуллина) Сәгъдәт Габдулла кызы 1919 елның 2 мартында Балык Бистәсе районы Яншык авылында дөньяга килә. Ул шул авылда бала чагын, мәктәп елларын үткәрә. Шунда сугышның барлык авырлыкларын да татый. Сугыш башлангач, барлык ирләр дә сугышка китеп бетә. Ә безнең карт әби ирләр урынына басып, барлык эшләрне дә башкара, колхоз җитәкчесе нинди эшкә кушса, шунда эшли. Ул үгез җигеп җир дә сөргән, кырга чәчүлек орлык та чыгарган. Кирәк вакытта сыер җигеп районга да чыгып киткән, урманын да кискән, окоп казырга да йөргән. Аларның авыр хезмәтен, бернинди алтыннар белән дә алмаштырып булмый. Карт әбием туган авылында җиңү яуласа, карт бабам сугыш кырында җиңү яулаган. Минем карт бабам Касыйм, 1912 елның 25 гыйнварында Татар Казысы авылында туган. Шул авылда үсеп буйга җиткән. Яше җиткәч, армия хезмәтенә киткән. Анда хезмәт срогы беткәч, кабат туган авылына әйләнеп кайткан. Туган йортында озак ял итеп ятарга туры килми, чөнки финнар сугыш башлаган. Карт бабамны сугыш кырларына озатканнар. Ул беркайчан да үзен кызганмаган, һәрвакыт алда барган. Финнар белән сугышып, җиңү яулап, исән-имин кабат туган авылына әйләнеп кайткан. Озак ял итә алмаган, 1941 елда тагын сугыш башланган. Карт бабамны тагын фронтка алганнар. Ул кайларда гына сугышмаган! Ленинград блокадасында да катнашкан. Берлинга кадәр барып җиткән! Бабам Берлинны яулап алганда яраланып госпитальгә эләккән. Сугыш беткәч тә, ул тиз генә өйгә кайтмаган. Җимерек авылларны аякка бастыруда катнашып, 1945 елның ноябрендә генә туган авылына кайткан. Бабам сугышта күрсәткән батырлыклары өчен "Икенче дәрәҗә Ватан сугышы" ордены, "Сугышта күрсәткән батырлыклары өчен" медале белән бүләкләнгән.
