Кәефне дә күтәрделәр, бүләкле дә булдылар

Бәйгенең иң актив һәм талантлы катнашучылары укытучылар булды. Өчесе дә белем бирү йортларында эшлиләр, яшь буынны тәрбиялиләр. Аларның профильләре төрле булса да, иҗатта бу комачауламый. Бигрәк тә юмор хисе барында һәм әйләнә-тирәдәгеләргә елмаю бүләк итәргә теләгәндә, сүзләр үзләре туа.

- Математика - шулай ук шигърият ул, - ди җиңүчебез Татьяна Кузнецова үзе укыткан фәнен мактап. - Мин төгәл фәннәрне дә, гуманитар фәннәрне дә яратам. Иҗат итү дә тарта мине. Күптән нинди дә булса бәйгедә катнашасым килеп йөри идем, нишләптер, бераз шөлли идем. Ә бу юлы ник катнашмаска, дип уйладым. Һәм үкенмим. Җиңүем турында беркемгә дә әйтмәдем. Нәтиҗәләр турында белгәч, башта ышанмый тордым, - дип куанычын яшерә алмады Ленино-Кокушкино мәктәбе укытучысы.

- Рәсем асты уйлап тапкач та әле җибәрергә тормаган идем, - ди коррекция мәктәбе хезмәткәре Гүзәл Волостнова. - Кызым үгетләде: язгач, җибәрергә кирәк, диде. Ул бөтенесен язып, электрон почтагызга юллады. Һәм тикмәгә булмаган. Мин бик канәгать.

- Мин эшемдә дә гел нәрсәдер уйлап табу белән мәшгульмен. Мондый бәйгеләрне бик яратам, газетаны һәрвакыт яздырып, укып барам, - ди Татар Казысы мәктәбе укытучы-оештыручысы Флера Хәйретдинова. - Сезнең бәйгеләрне күзәтеп барам, катнашып киләм. Сез үзегез үк безгә яхшы кәеф бүләк итәсез. Без мондый бәйгеләрне бик яратабыз, җиңүгә дә өмет итәбез, билгеле. Бу бик кызык һәм җәлеп итә торган нәрсә. Ә бүләк алу һәрвакыт күңелле инде анысы.

Соңыннан җиңүчеләребез үз теләкләрен дә җиткерде.

- Бәйгеләрне ешрак үткәрегез, бик кызык бит! - диде алар бертавыштан.

Татьяна Кузнецовага - төп призны һәм Гүзәл Волостнова белән Флера Хәйретдиновага хуплау призларын "Московская ярмарка" кибете директоры Рәсим Галандар оглы Гусейнов үзе тапшырды.

Җиңүчебез өч оныгын сөендерергә теләде. Ул балалар киемнәрен сайлады. Калган призерларыбыз сөлге һәм зонтиклар алды. Бу әйберләр аларга хуҗалыкта бик ярап куячак һәм бәйге истәлеге булып торачак.