Болар барысы да авыл халкының уртак тырышлыгы белән тормышка аша.
Ленино-Кокушкино мәчетендә зур үзгәрешләр бара. Фасад ремонтланган, мәдрәсә төзелгән, аның артында мини-парк төзекләндерелә.
Имам-хатыйб Ришат хәзрәт Галимҗанов мәчетне ике ел җитәкли. Тумышы белән Әтнә районыннан, Питрәч районында 1982 елдан бирле яши. Ремонт эшләренә бу вазыйфага керешү белән үк диярлек керешкән.
– Элек монда мәчет кенә иде, стенасы җимерелә башлаган иде инде. Без фасадны тышладык һәм җылыттык, – дип сөйли ул.
Ул вакытта уку процессы өчен мәчеттә бүлмә бүлеп бирелгән – ул кысан һәм уңайсыз була. Шулай итеп, аерым мәдрәсә төзү идеясе туа. Бүген мәдрәсә эшли инде. Биредә беренче уку елы тәмамланган, кухня җиһазландырылган, ифтарлар өчен өстәлләр һәм утыргычлар урнаштырылган зал бар. Дәресләрне остазлар Равия һәм Фәридә үткәрә – хәзер аларның 40 ка якын укучылары бар.
– Без мәчет территориясендә дә, мәдрәсәдә дә тәртип һәм чисталыкны саклыйбыз. Башта мин олылар белән бергә укыдым, аннары “Мөхәммәдия” мәдрәсәсен тәмамладым һәм хәзер рухи мәгърифәткә үз өлешемне кертәм, – ди Фәридә Әхмәтҗанова.
Бу көнне хатын-кызлар чәчәкләр утырттылар һәм төп керү урынын төзекләндерделәр. Ул арада читтәге бакчада алмагачлар, груша, слива һәм карлыган утырталар иде. Бөтен җирдә эш гөрли.
– Яңгыр суларын агызу өчен канализация ясыйбыз, чөнки көчле яңгырлар вакытында су җыела. Аның өчен торба куярга телибез, – дип аңлатты Руслан Юнысов көрәк белән җир казыган арада.
Паркта балалар өчен газон чәчелгән, брусчатка да булачак. Якын киләчәккә планнар – комлык һәм таган урнаштыру. Үсеп килүче буынга аерым игътибар бирелә. Әлегә унлап кыз һәм малай җыела, ләкин күбрәк булыр дип өметләнәләр.
– Балалар бирегә әби-бабайлар белән бергә уйнарга килсеннәр иде. Шул рәвешле өлкән буынны да, яшьләрне дә җәлеп итәчәкбез, – ди имам-хатыйб.
