Питрәч районында яңа автокибет барлыкка киләчәк

Фото: «Татар-информ»

Татарстан Рәисе Рөстәм Миңнеханов Татарстан кулланучылар берлегенең район филиалларына 10 автокибет ачкычын тапшырды. Тантана «Казан Экспо» мәйданчыгында «Агроволга» Халыкара агросәнәгать күргәзмәсе кысаларында узды.

«Халыкара кооперация көне алдыннан әлеге системаның эшен яхшыртуга ниндидер өлеш кертү өчен сәбәп бар», — диде республика җитәкчесе.

Автокибетләрне Әгерҗе, Апас, Балтач, Биектау, Кайбыч, Яңа Чишмә, Нурлат, Питрәч, Балык Бистәсе һәм Сарман районнарының кулланучылар кооперативлары һәм җәмгыятьләре алды.