Анда 246 якташыбыз урын алган
Фото: © Люция Сиразеева / «Пестрецы-информ»
Район үзәгенең балалар шәһәрчегендә хезмәт һәм батырлык фестивале узды, аның кульминациясе – Татарстан Республикасының Электрон мактау тактасына кертелү турындагы таныклыкларны тапшыру булды. Район башлыгы Рәис Сөләйманов анда районның иң яхшы 246 хезмәткәре булуын билгеләп үтте.
– Нәкъ менә сез – махсус хәрби операциядә катнашучылар, эшчеләр, табиблар, укытучылар, механизаторлар, төзүчеләр, инженерлар, эшмәкәрләр, башка бик күп һөнәр ияләре – йортлар саласыз, икмәк үстерәсез, дәвалыйсыз, өйрәтәсез, яклыйсыз. Нәкъ менә сезнең профессиональлегегез, хезмәт сөючәнлегегез һәм җаваплылыгыгыз ярдәмендә безнең район үсештә, - дип ассызыклады Рәис Әхтәмович.
Татарстан Республикасы Хезмәт, халыкны эш белән тәэмин итү һәм социаль яклау министры Эльмира Зарипова питрәчлеләргә сәламләү сүзе белән мөрәҗәгать итте.
- Һәр муниципаль районда булдырылган бар нәрсә хезмәт кешесе кулы белән булдырылган. Республикада 1 майда Яз һәм Хезмәт көнендә Электрон мактау тактасы барлыкка килде, мөгаен, бу быел иң якты чара булгандыр, бүгенге көндә анда 15300 татарстанлының исеме язылган, - диде ул.
Бүләкләнүчеләр арасында «Ак Барс» кошчылык комплексыннан Николай Кузнецов та бар. Хезмәт стажы 40 елдан артык булган машина йөртүче 1980 елдан бирле руль артында. «Газ-51», «ЗИЛ», «КамАЗ» автомобильләре, автобус белән идарә иткән, соңгы елларда җиңел машинада эшләгән. Ул «Татарстан Республикасының атказанган авыл хуҗалыгы хезмәткәре» исеменә ия. Хәзер лаеклы ялда һәм предприятие ветераны.
- Яшьтән үк иртәдән кичкә кадәр эшләдек. Әлбәттә, онытмаулары сөендерә, - ди ул.
«Ак Барс Питрәч» ҖЧҖнән машина белән сыер саву операторы, Татарстан Республикасының атказанган терлекчесе Илсөяр Гайнуллина уңышының сере үз эшенә булган мәхәббәтендә, дип саный.
– Мин бу һөнәрдә – 35 елдан артык. Хезмәтемне шулай югары бәяләгәннәре өчен җитәкчелеккә бик рәхмәтлемен, – ди ул.
Шулай ук чарада яңа туган балага район күләмендә 15 мең сум күләмендә сертификат тапшырылды. Аңа ия булучыларның берсе – күп балалы Сәйфетдиновлар гаиләсе: Питрәчтән Алсу һәм Илфат. Аларның кече балалары Исламга – ике ай, уртанчы балалары Самирга 2 яшь, олы кызлары Айсылуга 10 яшь. Ир белән хатын 11 ел бергә.
- Сертификат өчен зур рәхмәт, бу безнең өчен шатлык. Бу турда беркайчан да ишетмәдек, уйламадык та. Аны гамәлгә куючыларга рәхмәт белдерәбез, - дип билгеләп үтә әни.
Бүләкләү тантанасыннан тыш сәхнәдә җырлар яңгырады, ә мәйданчыкта төрле мастер-класслар оештырылды.
