Ураза Гаетен каршыларга әзерләнәбез

Изге Рамазан аенда район хакимияте һәм мөхтәсибәте ярдәме белән ураза тотучы мохтаҗ һәм аз тәэмин ителгән мөселманнарга азык-төлек җыелмалары таратылды.
Безнең районда ел саен бөтен район күләмендә ифтар үткәрелә иде. Бу күркәм традиция быел да дәвам итте, әмма яңа форматта. Район мәчетләренең имам-хатыйбларына азык-төлек пакетларын район башлыгы Илһам Кашапов тапшырды.
- Әлеге хәйрия акциясе район башлыгы инициативасы белән үткәрелә, - диде район имам-мөхтәсибе Әббәс хәзрәт. Азык-төлек пакетлары район хакимияте, эшмәкәрләр, район оешмалары һәм учреждениеләре вәкилләре акчасына сатып алынды. Безнең районда барлыгы 20 мәхәллә бар, аларның һәркайсы тәкъдим ителгән исемлек буенча пакетлар алачак. Санитар-эпидемиологик хәлне исәпкә алып, күп кеше катнашында мәҗлесләр үткәрү туктатылды. Бу мәҗлесләргә ифтарлар да керә, шуңа күрә быел азык-төлек пакетларын өләшергә карар кылынды.
Салкын Чишмә мәчете имам-хатыйбы Әнвәр Гибатов үз мәхәллә кешеләре өчен азык-төлек җыелмалары алырга тормыш иптәше Мәүлия абыстай белән килгән иде.
- Безгә азык-төлек җыелмалары белән утыз пакет алырга туры киләчәк, без аларны өлкәннәргә һәм мохтаҗларга өләшәчәкбез. Авыл халкы исеменнән Илһам Миңнехановичка һәм әлеге игелекле акциянең спонсорларына рәхмәт әйтәсе килә, - диде алар.
Иң күп пакетны (барлыгы 60 данә) Татар Казысы мәчете имам-хатыйбы Әхмәт Хәкимов алды. Иң күп ураза тотучылар бу авылда.
- Бу изге эшкә катнашы булган һәркемгә сәламәтлек һәм иминлек телим, - дип билгеләп үтте ул.