Район үзәгенең икенче мәктәбе ярты миллион сумга ия булды

Театр 22 ел элек барлыкка килгән. Бу вакыт эчендә зур уңышларга иреште, күп тапкыр республика һәм бөтенроссия конкурсларында призер һәм җиңүче булды. Бүген дә яшь артистлар шундый ук  рухта эшли. Алар өчен бу буш вакытта күңел ачу гына түгел. Аларның кайберсе гомерен сәхнә белән бәйләргә планлаштыра.

Минемчә, театр талантларны ачарга ярдәм итә, зур тамашачы алдында матур чыгыш ясарга өйрәтә, - дип саный тугызынчы сыйныф укучысы Булат Әскәров.

Алга таба егет театр уку йортына укырга керергә тели.
Укытучы балаларны атнага кимендә өч тапкыр репетицияләргә җыя, кайвакыт хәтта ял көннәрендә дә. Иҗади коллективта 45 кеше шөгыльләнә, алар яше буенча 3 төркемгә бүленгән. Балалар язучы-классиклар һәм драматургларның әсәрләре буенча куелган татар спектакльләре белән чыгыш ясыйлар. Татарстанның төрле шәһәрләре һәм районнары буйлап йөриләр. Кәрим Тинчурин пьесалары буенча  «Зәңгәр шәл», «Сүнгән йолдызлар» спектакльләрен куйды алар.  Тиздән Мирхәйдәр Фәйзинең «Галиябану» спектаклен әзерләячәкләр.

Балалар бик кызыксынучан, сәләтле, тырыш. Алар театр дип яши, - ди режиссер Елена Галәветдинова.

Әйе, һәр иҗади эштә иң мөһиме - теләк һәм талант. Мәктәп коллективының сәхнә киеменә кытлык кичергәне юк иде. Хәзерге вакытта аларга костюмнарны мәдәният бүлеге бирә.

Без еш кына үзебезнең театр гардеробы булса ничек яхшы булыр иде, дия идек. Нәкъ менә шуңа күрә дә грант бәйгесендә катнаштык. Безнең өчен бу җиңү зур шатлык. Тиздән малайлар һәм кызлар өчен милли киемнәр, шулай ук реквизит һәм декорацияләр сатып ала башлаячакбыз, - дип сөйләде безгә Елена Николаевна.