Иске Шигали мәктәбе укучысы «Игелекле Татарстан» конкурсының финалисты булды

Иске Шигали авылында яшәүче, «Форпост» мәктәп берләшмәсе лидеры Саимә Шаһиәхмәтова «Игелекле Татарстан» конкурсында катнашты.
 

Ул онлайн-форматта берничә турдан торды. Беренче турда портфолио рәвешендә заявка бирелде. Мин "Гражданлык-патриотик эш өлкәсендә ел волонтеры" номинациясендә катнаштым", - дип үз фикерләре белән уртаклаша Саимә.

Ул икенче этапка да узды, анда презентация яклады, гражданлык-патриотик юнәлештә үз эшчәнлеге турында сөйләде.

Нәтиҗәдә, кыз финалист булды һәм аны Идел буе дәүләт физкультура, спорт һәм туризм академиясенә йомгаклау чарасына чакырдылар.

Без көне буе Универсиада  Авылы территориясендә академиядә булдык. Бик күп яңалыклар белдек һәм көнне файдалы итеп үткәрдек, - ди кыз.

Шулай ук Саимә "Хокукый белемнәр мәктәбе"нең "Форпост" үзәге проекты белән авторлык программалары, методик эшләнмәләр һәм фәнни публикацияләр республика конкурсында җиңү яулады.