Питрәч районы педагоглары яңа уку елына әзер

Мөхтәрәм кунакларны холлда милли ризыклар белән каршы алдылар. Ә алда аларны мәктәп һәм балалар бакчалары хезмәткәрләре балалар белән бергә дулкынланып көтте. Алар катнашучыларга күргәзмәне тәкъдим иттеләр. Нәрсә белән шөгыльләнүләрен һәм үз сәләтләрен күрсәттеләр.

Виртуаль чынбарлык шлемы, робототехника, агробиология станциясе

Мәктәпкәчә белем бирү учреждениеләре тәрбияләнүчеләрдә патриотизм һәм толерантлык хисләрен үстерүгә зур игътибар бирәләр. Балалар районда төрле милләт вәкилләре дә яшәвен белеп үсә. Үзләренең күптөрле һәм бай мәдәнияты булган башка халыклар да бар. «Үсенте»дә тәрбияләнүчеләр  Мари Эл һәм Чувашиядән күршеләр белән  видеоэлемтә буенча аралашалар, аларның гореф-гадәтләре һәм йолалары белән танышалар. «Бәләкәч» балалары төрле телләрдә мультфильмнарны яңгыраталар.
Район укучылары да бай тормыш белән яши. Тәнәфесләрдә һәм дәресләрдән соң күңелсезләнеп коридор буйлап йөрмиләр, ә күп кенә кызыклы нәрсәләр белән шөгыльләнәләр. Аларны кызыксындыру өчен мәктәпләрдә заманча җиһазлар һәм техника булдырыла. Кощакта виртуаль чынбарлык шлемы бар. Балалар җайланманы башларына кияләр һәм башка киңлеккә чумалар: су асты дөньясына, космоска экскурсия ясыйлар, дөнья тирәли сәяхәт итәләр.

Бу бик кызык. Җир шарының теләсә кайсы почмагында булырга мөмкин. Без төрле илләрнең истәлекле урыннарын һәм иң искиткеч локацияләрне карадык. Бразилия пляжы гаҗәпләндерде. Хис-кичерешләрне аңлатып бетереп булмый, үзеңне диңгездә кебек хис итәсең, - дип тәэсирләре белән уртаклашты сигезенче сыйныф укучысы Вероника Сидакова.

«Прогресс» җирле лицее укучылары һәм укытучылары үз проектлары һәм өстәмә белем бирү турында күп сөйләделәр. Биредә иң гадәти булмаган түгәрәкләрнең берсе - робототехника һәм программалаштыру. Балалар кояш энергетикасын, 3Д-модельләштерүне, газлар хәрәкәтен өйрәнәләр, гади конструкторлардан роботлар төзиләр һәм алар белән пульттан идарә итәләр.
Шулай ук лицейда экологик тәрбия бирүгә дә зур игътибар бирелә. Агробиология станциясе ачу планлаштырыла. Ул әлегә юк, әмма экспериментлар башланды инде.

Без кыргый помидор, сары-кызгылт төстәге тропик җимеш кумкват, папайя, манго, ананас үстерәбез. Үсентеләр мәктәптә үстерелә. Аннары бу сортларны без укучылар һәм педагоглар арасында бүләбез. Алар үсемлекләрне үз кишәрлекләренә алып китә һәм аларны үстерә, - дип билгеләп үтә директорның фәнни-методик эш буенча урынбасары Оксана Корбанова.

Тиздән агробиологик экспериментлар өчен аларга махсус территория бүлеп биреләчәк, ул чакта районда экзотик яшелчәләр һәм җиләк-җимеш үсәчәк. 

Яңа объектлар төзелә, балалар саны арта

Мавыктыргыч күргәзмәдән соң, һәркем чараның тантаналы өлеше узачак актлар залына юнәлде. Һәрвакыттагыча, август конференциясендә узган уку елына йомгак ясадылар һәм киләчәккә үсеш өстенлекләре турында фикер алыштылар. 
Президиумда ТР Мәгариф һәм фән министры урынбасары Рәмис Мөҗипов, ТРда Кеше хокуклары буенча вәкаләтле Сәрия Сабурская, район башлыгы Илһам Кашапов, район мәгариф бүлеге  башлыгы Марина Харитонова утырды. Тамашачылар залында педагоглар урын алды.
Районда 17 балалар бакчасы һәм шул ук санда мәктәп эшли. Балалар бакчаларына 2166 бала йөри, 2 ел элек алар 478гә азрак иде. Мәктәпләр быел 6 меңнән артык укучыны кабул итә, узган ел 4000 иде. Богородск авыл җирлегендә яңа лицей һәм 2 балалар бакчасы төзелә.
Узган уку елында 9 нчы сыйныф укучылары гомуми дәүләт имтиханы буенча югары нәтиҗәләр күрсәттеләр. БДИ буенча хәлләр күпкә яхшырак – ун фәннең бишесе буенча имтиханнарның уртача балы республика күрсәткечләреннән  югарырак. Соңгы берничә елда югары балл җыючыларның артуы күзәтелә. Быел 94 чыгарылыш сыйныф укучысының 20се мәктәпне алтын медаль белән тәмамлады. Әмма икесе үз медальләрен расламады, алар дәүләт имтиханнарын начар тапшырды. Шуңа күрә укытучыларны укучыларның белемнәрен объектив бәяләргә чакырдылар.
Укучыларыбызның төрле дәрәҗәдәге фән олимпиадаларында катнашулары буенча уңай динамика күзәтелә. Быел 22 укучы Бөтенроссия фән олимпиадаларының төрле этапларында җиңүче һәм призер булды. 50дән артык бала ГТО нормативларын үтәде.
Мәктәпләргә 5 яшь педагог киләчәк: Питрәчнең беренче мәктәбе өч, Керәшен Сәрдәсе  һәм  Колай мәктәпләренә берәр укытучы. Әмма укытучылар җитмәү мәсьәләсе ачык кала һәм аны хәл итүне дәвам итәчәкләр.
Быелгы уку елына барлык бурычларны билгеләп, катнашучылар иң күңелле мизгелгә – педагогларны уңышлы эшләре өчен бүләкләү тантанасына күчтеләр. Аларга Рәхмәт хатлары, грамоталар тапшырылды, исемнәр бирелде һәм күкрәк билгеләре тапшырылды. Яшь педагоглар ант бирде, шуннан соң аларга ноутбуклар бүләк иттеләр.