Актив булсак – вакытында үтәлер
29 мартта референдумда питрәчлеләр уртак фикергә килде - үзара салым кертү хупланды, халык авыл җирлекләрендә тормыш шартларын яхшырту, үсеш, яхшы якка үзгәрешләр өчен тавыш бирде.
Күпчелек авыл җирлекләре бюджетларын тулыландыруның бердәнбер чыганагы - җир салымы һәм физик затлар милкенә салым. Әлеге салымнардан кергән акча җирле бюджет кеременең берничә процентын гына тәшкил итә, шуңа күрә җирле салымнар системасы муниципалитетларның финанс мөстәкыйльлеген тәэмин итә алмый. Шул уңайдан җирле бюджетларның үз керемнәре исемлеген киңәйтү максатыннан гражданнарның үзара салымы кертелә. Муниципаль берәмлек территорияләрендә әлеге түләүләр җирле бюджетларның керем базаларын арттыру мөмкинлеге бирәчәк.
Һәр авыл җирлегендә яшәүчеләр гражданнар җыеннарында җыелган акчаларның нинди максатларда кулланылачагын үзләре хәл итә алды. Кайдадыр урамнар төзекләндереләчәк, кайдадыр юллар, күперләр ремонтланачак һәм төзеләчәк, шулай ук урамнарны яктырту проблемасы хәл ителәчәк. Әмма планлаштырылганнарны тормышка ашыру өчен һәрберебез әлеге эшнең мөһимлеген аңларга һәм моңа җаваплы карарга тиешбез. 131 нче Федераль закон нигезендә әлеге түләүләрне кертү һәм файдалану турындагы карар муниципаль берәмлек территориясендә барлык гражданнар һәм вазифаи, юридик затлар тарафыннан үтәлергә тиеш.
Әлеге мәсьәләне хәл итүдә татарказылылар зур активлык күрсәтте. Алар үзара салым түләүләрен йөз процентка үтәгән. Кайбер башка җирлекләр дә алардан калышмый. Әмма бу эшкә сүлпән караучылар да бар, шуның белән алар җыеннарда билгеләнгән планны үтәү вакытын озакка суза. Билгеләнгән планнарны тормышка ашыру һәммәбездән дә активлык сорый.
Следите за самым важным и интересным в Telegram-каналеТатмедиа
