Алга (Вперед)
  • Рус Тат
  • Питрәчлеләрнең хокукларын һәм мәнфәгатьләрен яклыйлар

    1722 елда, Петр I Павел Ягужинскийны дәүләтебез тарихында беренче генераль прокурор вазыйфасына билгеләгәндә, “Бу минем күзем, аның белән мин барысын да күрәчәкмен”, дигән. Шул вакыттан бирле өч йөз елга якын вакыт узган, әмма Бөек император сүзләре бүген дә актуаль. Прокуратура Россия Федерациясе исеменнән эш итә һәм законлылыкны, хокук тәртибен саклауны күзәтүне гамәлгә ашыра. 12 гыйнварда Россия Федерациясе прокуратурасы хезмәткәрләре үзләренең һөнәри бәйрәмнәрен билгеләп үттеләр. Шул уңайдан, хәбәрчебез Люция Сираҗиева Питрәч районы прокуроры Алмаз Әхмәтшин белән әңгәмә корды.

    - Алмаз Идрисович, башта укучыларны тантана сәбәпчеләре, Питрәч районы прокуратурасы коллективы белән таныштырасы килә.   
    - Бездә 6 кеше эшли. Алар - прокурор урынбасары Петр Глухов, прокурор ярдәмчеләре Гүзәл Хәмидуллина һәм Игорь Осипов, беренче разрядлы өлкән белгеч Лилия Шаһиева, шулай ук прокуратура шоферы Булат Зыятдинов. Район прокуратурасының һәр оператив хезмәткәренә күзәтчелек юнәлеше беркетелгән. Барлык хезмәткәрләр дә тәҗрибәле белгечләр, озак вакытлар үз вазыйфаларында торалар, үзләренә йөкләнгән бурычларны  оста башкаралар. Район һәм аның халкы проблемалары турында ишетеп кенә белмиләр.
    - Питрәчлеләрне нәрсә борчый, алар барыннан да күбрәк нәрсәдән  зарланалар?  
    - Быел 445 мөрәҗәгать каралды, биш йөздән артык граждан шәхси кабул итү вакытында мөрәҗәгать итте. Биредә барыннан да бигрәк хезмәт һәм торак хокукларын, җир законнарын, суд приставларының гамәлләрен бозу мәсьәләләре яңгырый. Кешеләр безгә хәтта беренче карашка, гади генә кебек тоелган сораулар буенча юридик консультацияләр алу өчен дә килә.
    – Яңа ел башы - нәтиҗәләр ясау өчен иң яхшы вакыт. Кайбер күрсәткечләрне безнең белән дә уртаклашсагыз иде.  
    - Узган ел район прокуратурасы тарафыннан 602 закон бозу очрагы ачыкланды, аларның нәтиҗәләре буенча 23 законсыз норматив актка протест белдерелде; 19 гариза судка җибәрелде; федераль закон бозуларны бетерү турында 271 күрсәтмә бирелде, аларны карау нәтиҗәләре буенча 289 вазыйфаи зат дисциплинар җаваплылыкка тартылды; 17 вазыйфаи зат административ җаваплылыкка тартылды; 6 кисәтү игълан ителде һәм 2 җинаять эше кузгатылды. Моннан тыш, судларда прокуратураның оператив хезмәткәрләре 180 җинаять эше буенча гаепләүләрне хуплады.  
    - Прокуратурада эшләү вакытны күп аладыр, мөгаен?
    - Район прокуратурасы эше конкрет чорга планнар нигезендә төзелә. Планлаштырылган чараларны төгәл үтәгәндә эшләү өчен дә, шәхси тормыш өчен дә вакыт җитә. Тик прокуратура органнарында эшләгәндә, һәр хезмәткәр үз вазыйфаларын үтәүгә һәм килеп туган мәсьәләләрне хәл итүгә күңел белән якын килергә тиеш. Нигездә, кешеләр прокуратурага яхшы яңалыклар белән уртаклашу өчен килми. Кичекмәстән хәл итәргә кирәк булган мәсьәләләр дә була. Мондый очракларда вакыт артыннан күзәтергә туры килми. Кешеләрнең тынычлыгы һәм иминлеге кайвакыт вакытында һәм дөрес карар кабул итүгә бәйле.

     

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: