Эш булса, авылда калырга әзерләр

Быел экскурсия "Ак Барс Питрәч" агрофирмасына оештырылган иде. Ул машина-трактор паркында һәм терлекчелек комплексында үтте. Монда Татар Тау Иле, Күн, Чыты, Шәле һәм башка мәктәп укучылары катнашты. Чараның төп максаты - яшьләрне авыл хуҗалыгы белгечлекләре белән таныштыру һәм яшьләрне тормышларын авыл белән бәйләүләренә ирешү. Бүген авыл хуҗалыгы тамырдан үзгәрде. Ул үсә, компьютерлаша һәм яңа заманча технологияләр кертелә, хезмәт хакы арта, эш җиңеләя.

Экскурсия вакытында битарафлар булмады. Мәктәп укучылары һәр техниканы, җиһазны кызыксынып карады. Татар Тау Иле урта мәктәбе укучысы Алсу Хөснетдинованы чит илдән кайткан машиналар кызыксындырды.

- Аларның зурлыгы, функцияләре гаҗәпләндерә. Барысы да компьютерлашкан, белемең булмаса, эшли алмассың да, - ди ул.

Ә Күн авылыннан Алсу Галимбәкова ветеринария табибы булырга хыяллана икән. Югары белем алып, районга кайтырга дигән планнар кора.

- Сыйныфташларның күпчелеге авылда калырга тели. Ләкин моның өчен барлык шартлар да булырга тиеш. Беренче чиратта, җаныңа ошаган эш, - дип фикерләре белән уртаклашты ул.