Мәшгульлек үзәген яшьләр үз итми. Дәүләт учреждениесенең төп клиентлары - утыз яшьтән узган кешеләр. Хезмәт биржасы ни өчен яшьләрне канәгатьләндерми?
Сәбәпләре бик күп. Шуларның берсе, мәшгульлек үзәге тәкъдим иткән вакансияләр яшьләр өчен кулай түгел.
Сер түгел, яшьләр мәшгульлек үзәгенә ышанып бетми, шуңа күрә дә бирегә килергә бик ашкынып тормый. Ни өчен? Бер танышым: "Анда беркайчан да юньле эш тәкъдим итмиләр", - диде. Анда күбесенчә, өлкән яшьтәгеләр мөрәҗәгать итә. Яхшы эш табу өчен, кем әйтмешли, бер пот тоз ашарга кирәклеген күпләр белә. Шул ук вакытта эш эзләүнең үз кагыйдәләре дә бар. Ничек дөрес итеп эш эзләргә? Әлеге сорау белән без Казан кадрлар агентлыгы хезмәткәре, психолог Рәзил Вәлиевка мөрәҗәгать иттек. "Эш эзләү үзенчәлекле уен ул. Аның бик күп ысуллары бар. Мин сезгә шуларның җидесен китереп китәм", - диде ул.
Беренче ысул - бу танышлар һәм дуслар. Бу ысул һәр чорда да үз эшен эшләгән. Тик тиз арада карьера ясыйм дип уйламагыз. Бар да сезнең компаниягә никадәр туры килүегездән тора.
Икенче ысул - резюме. Бу очракта иң мөһиме - аны дөрес итеп тутыра белү. Резюмыгыз күпме аңлаешлырак һәм ачыграк булса, аны укуларына өмет тә шулкадәр зуррак. Бүген резюмыгызны калдырыр өчен кадрлар агентлыгы эшли.
Өченче ысул - эш бирүче белән турыдан-туры аралашу. Сез үзегезгә яраклы эш таптыгыз. Бары теләгегезне тормышка ашырырга гына кирәк. Резюмы җибәрүдән тыш, компаниягә барып үзегез белән таныштырырга кирәк. Әгәр анда сезгә яраклы вакансия табылмаса, һичьюгы үзегезнең резюмыгызны калдыра аласыз. Бу очракта бер түгел, берничә оешмага барырга кирәк.
Дүртенче ысул - Интернет. Бу бүген эш эзләүнең иң киң таралган ысулы. Барлык компанияләрнең сайтларында вакансия дигән рубрика бар. Сез аларда үзегезгә кирәкле бик күп мәгълүмат ала аласыз.
Бишенче ысул - социаль челтәр. Соңгы вакытта күп оешмалар квалификацияле эшчеләр табуда нәкъ менә социаль челтәрләрдән файдалана. Чөнки яшьләр күп вакытларын социаль челтәрләрдә уздыра. Шуның өстенә, эш бирүче биредә вакансияләрне кызыклы, стандарт булмаган төрдә тәкъдим итә ала. Тик монда да итагатьлелекне сакларга кирәк, артык мавыгып китәргә ярамый.
Алтынчы ысул - кадрлар агентлыгы. Кадрлар агентлыгына мөрәҗәгать иткәнче, иң беренче, аның нинди юнәлештә эшләвен ачыклагыз. Әгәр тиешле урынга мөрәҗәгать итмәсәгез, акчагызны бушка сарыф итү булачак.
Җиденче ысул - мәшгульлек үзәге. Халыкта бик ышаныч казанмаса да, кайчакларда биредә дә яхшы эш урыннары килеп чыгарга мөмкин. Һичьюгы кайсы оешмаларга яшь, энергияле кадрлар кирәклеген белерсез.
Соңгысы, әгәр сез үзегезгә яраклы эш урыны тапсагыз, иренмәгез, аның турында барлык мәгълүматны туплагыз. Әңгәмә вакытында сезгә, һичшиксез, ни өчен бу оешманы сайладыгыз дип сорау бирәчәкләр. Әгәр ышанычлы итеп җавап бирсәгез, эш бирүчедә уңай фикер калдыра алачаксыз. Бу сезнең әлеге оешмада кечкенә генә булса да беренче җиңүегез булачак. Максатчан булыгыз, шул вакытта гына барысына да ирешә алырсыз.
Иң мөһим һәм кызыклы язмаларны Татмедиа Telegram-каналында укыгыз
