Алардан гаиләләр теләсә кайсы вакытта файдалана алачак
Питрәчтә һәлак булган хәрбиләрнең гаиләләре “Минем Ранчо” ял базасында кунакта булдылар. Алар өчен танышу визиты оештырылды: кунаклар территорияне, урнашу шартларын карарга һәм саф һавада вакыт уздырырга килделәр.
Яшьләр үзәге хезмәткәрләре кунаклар өчен “Гаилә хәрәкәте” уен программасын үткәрделәр. Аңа “Төз ыргыту”, “Боҗрага ыргыту”, “Чиләк белән йөгерү”, “Күк аслары” һәм “Йөрәк пазлы” кебек хәрәкәтчән конкурслар керде. Катнашучылар уеннарга кызыксынып кушылды, ә җиңүчеләргә грамота тапшырылды.
Очрашуның төп нәтиҗәсе базага бушлай керү һәм өйләргә урнашу өчен сертификатлар тапшыру булды – алардан гаиләләр теләсә кайсы вакытта файдалана алачак. Аны биш гаилә алды. База идарәчесе Айсылу Шиһабиева билгеләп үткәнчә, бу – гаиләләргә монда соңыннан килеп, табигать кочагында тыныч мохиттә ял итә алсыннар өчен ясалган ярдәм ишарәсе. Визит бергәләп чәй эчү белән тәмамланды.
Бәйрәм кунакларының берсе – Көек авылыннан ике улы белән Алсу Павлова. Ул чакыру гаилә өчен көтелмәгән һәм күңелле сюрприз булуын таныды. Алсу ире Михаил Павловның хәрби бурычын үтәгәндә һәлак булуы һәм үлгәннән соң Батырлык ордены белән бүләкләнүе турында сөйләде.
– Без ирем һәм әтиебез белән горурланабыз, безне яклавы өчен рәхмәт аңа. Ялгыз калган хатын -кызларга һәм әниләргә ныклыклары өчен рәхмәт. Безнең бурыч – балаларыбызны лаеклы тәрбияләү, аларга белем бирү, – диде Алсу.
Сәфәр барышында гаиләләрне “Ватанны саклаучылар” фонды филиалының социаль координаторы Физәлия Никитина озата йөрде