“Соңгы гектарларда бөртеклеләр җыеп алынды”
Безнең районда бөртекле культураларны урып-җыю тәмамланып килә, күп кенә кырларда соңгы ашлык җыеп алынды. Бөртеклеләр 30874 гектар мәйданны биләде, эшкә җитмеш комбайн җәлеп ителде. Район буенча гектардан уртача уңыш чыгышы 21 центнердан артыграк тәшкил итте. Алдынгы хуҗалыклар булып "Рацин-Шәле" ҖЧҖ, "Ак Барс Питрәч" ҖЧҖ, "Макс-Ойл" ҖЧҖ һәм башкалар саналды. Биредә уңыш чыгышы район буенча уртача күрсәткечкә караганда югарырак.
"Газовик" ҖЧҖдә бөртекле культуралар 3350 гектар тәшкил ите, аларның күбесе "Богородск" бүлегенә туры килде, биредә 1900 гектар чәчелде.
- Без бүген бөртекле культураларны урып-сугып бетердек, - ди бүлек идарәчесе Айрат Шәрәфиев, - әйе, быел бик авыр булды, һава шартлары һәм кайбер факторлар яхшы уңыш алырга ирек бирмәде.
Моңа карамастан, безнең игенчеләр, эшчеләр үз эшләренә җаваплы карадылар. Урып-җыюда бездә, нигездә, бер комбайнчы - Николай Дудкин һәм аның ярдәмчесе Вадим Малов, ашлык ташу белән Юрий Дудкин һәм Анатолий Малкин мәшгуль булды.
Менә шулай, без үз көчебез белән уңыш өчен көрәштә җиңдек, хәзерге вакытта да кырларда эш бара, җир сөрелә, туфрак эшкәртелә.
Николай Дудкин районның алдынгы механизаторларының берсе, ул ел саен урак өсте вакытында лидерлар исемлегендә.
- Мин кырларда кырык елдан артык, ә комбайнчы буларак 38 сезон эшлим, - ди Николай, - минем беренче комбайн СК-4 иде, кыскасы, миңа безнең илдә чыккан барлык төр комбайннарда да эшләргә туры килде дисәң дә була. Инде алты ел "Полесье"да эшлим. Ә болай ел буе 35 еллык Т-150 тракторында. Мин техниканы яратам, аны һәрвакыт карап-майлап торам, шуңа күрә алар озак хезмәт итәләр. Тракторда җир эшкәртәм, сезонга меңнән артык гектар чәчәм. Ярдәмчем Вадим Малов минем белән бишенче сезон эшли, киләсе елга инде үзе комбайнчы булырга тели.
Әйе, быел уңыш начаррак, биредә бары бер тапкыр гына яңгыр явып үтте, ул бик вакытлы булды. Уңыш нинди генә булмасын, кырда бер бөртек тә калдырмадык.
Николай белән бергә бертуган абыйсы Юрий да эшли. Ул КамАзда ашлык ташый. Һәм урак өстеннән соң, кабат МТЗ-1221 тракторы руле артына утыра.
Ындыр табагында тынычрак, шулай да әле эш кайный.
- Биредә хәзерге вакытта барлыгы дүрт кеше эшли, - ди Айрат Шәрәфиев, - мөдир Фәрит Фәйзрахманов, машинистлар Виктор һәм Александр Логиновлар һәм эшче Наталья Михеева. Элегрәк мәктәп укучылары булышты. Урып-җыю башлануның беренче көненнән үк Алексей Иудин, Валерий Венедиктов, Азат Шәрәфиев һәм Ранил Гыйбашев ярдәм итте. Аларга бик зур рәхмәт.
Виктор Логинов элек хуҗалыкта электрик булып эшләде, хәзер ул лаеклы елда. Моңа карамастан, ул һәрвакыт урып-җыюда булыша.
- Александр һәм Виктор Логиновлар кебек тәҗрибәле белгечләр безгә һәрвакыт кирәк, - диләр хезмәттәшләре алар турында.
Следите за самым важным и интересным в Telegram-каналеТатмедиа
