Питрәчнең «Сәяхәт» бию коллективы Халыкара фестивальдә гран-при яулады

Питрәч районыннан «Сәяхәт» үрнәк хореография коллективы «Халыкара сәнгать көннәре» халыкара сәнгать фестиваль-конкурсында Гран-при иясе булды. Чара Казанның «Сәйдәш» мәдәният үзәгендә узды. 

Фестивальдә «хореография», «вокал», «театр» һәм башка номинацияләрдәге коллективлар һәм солистлар катнашты. Конкурсның иң югары бүләге конкурс көне йомгаклары буенча барлык номинацияләр арасында иң күп балл җыйган катнашучыга бирелә. Жюри карары буенча Гран-прины «Сәяхәт» коллективы алды.

Төп бүләктән тыш, коллективның барлык катнашучылары да халыкара үрнәктәге дипломнарга лаек булдылар. Җитәкчеләргә рәхмәт хатлары тапшырылды. Шулай ук «Сәяхәт»кә Россия территориясендәге башка конкурсларда бушлай катнашу хокукы бирә торган махсус сертификат тапшырылды. 

Коллектив белән Татарстан Республикасының атказанган мәдәният хезмәткәре Ренат Мифтахов җитәкчелек итә. «Сәяхәт» район
дәрәҗәсеннән алып халыкара дәрәҗәдәге төрле конкурсларда берничә тапкыр җиңүче булды.