Узган атнада Питрәч бозында ир-атлар һәм балалар командалары катнашында ике турнир үтте, аларда безнең хоккейчылар җиңүгә иреште.
БАРЫСЫ ДА СОҢГЫ МИНУТЛАРДА ХӘЛ ИТЕЛДЕ
Октябрь ахырында ПЛХЛ һәвәскәрләр лигасында өченче сезон башланды. «А+В» дивизионында сигез команда чыгыш ясый, алар арасында безнең ир-атлар командасы да бар.
25 октябрьдә Питрәч командасы «Питрәч – Арена» боз сараенда «Вымпел» ВДПО командасы белән сезонны ачты. Яңгырлы һава торышына карамастан, яраткан командаларына көч бирергә район үзәгеннән генә түгел, башка торак пунктлардан да күп җанатарлар килгән иде.
Безнең хоккейчылар уенны бик көчле башладылар, һәм тиздән яшь һөҗүмче Вадим Ящук исәпне ачты.
Тулаем алганда, уен Питрәч хоккейчылары өстенлегендә барды, алар бик күп һөҗүм итте, ләкин алкалар капкаларга бик сирәк эләкте. Безнекеләр алга чыкты, ә көндәшләр исәпне тигезләде.
Өченче периодта исәп 4:4 иде, бары тик зур тырышлык белән генә матч азагына бер минут ярым калгач, Рамил Исхаковның алканы төгәл кертүе турнирда беренче җиңү алып килде.
Калган алкаларны Альмир Дәминов, Тимур Сәмигуллин һәм Сабир Янов кертте.
Башка уеннар алдагыча тәмамланды: «Гагарин» - «Тимерхан» -3:3, ТХФП - «Торнадо» - 5:4.
Питрәчлеләрнең алдагы уеннары 1 ноябрьдә «Тимерхан» белән булачак, ә 8 ноябрьдә алар «Спутник» командасын кабул итәчәкләр.
БЕЗНЕКЕЛӘР ИКЕНЧЕ УРЫНДА
Өч көн дәвамында Питрәч бозында 2010 елгы яшүсмерләр арасында Халык бердәмлеге көненә багышланган ачык район турниры үтте. Төп приз өчен алты команда көч сынашты.
Питрәч командасы беренче уенда ук иң көчле командаларның берсе Казанның “Динамо” командасы белән уйнады һәм 2:6 исәбе белән оттырды. Безнең команда тагын бер очрашуда җиңелде, бу юлы “Сарматы” командасына (Оренбург) – 4:5 исәбенә. Калган өч уенда Питрәч малайлары ышанычлы җиңү яулады. Алар “Зилант”ны (Казан) – 8:2, “Сокол”ны (Новочебоксарск) – 5:2, “Кристалл”ны (Саратов) җиңделәр.
Нәтиҗәдә, өч команда (“Питрәч”, “Зилант” һәм “Сарматы”) тугызар очко туплады. Оештыручыларга шәхси очрашулар нәтиҗәләрен санарга туры килде, алар нигезендә безнең яшь хоккейчылар икенче урын алды (тренер Сергей Мошков), “Зилант” өченче һәм “Сарматы” дүртенче, “Сокол” бишенче һәм “Кристалл” алтынчы урында.
Беренче урынны “Динамо” яулады, алар барлык уеннарда да җиңде.
Питрәч командасының уенчысы Салават Хәйриев турнирның иң яхшы һөҗүмчесе дип танылды.
