2021 ел Татарстанда Туган телләр һәм халыклар бердәмлеге елы дип игълан ителде

- Без барыбыз да күп милләтле илебез турында бердәм фикерләр һәм эшләр белән яшибез. Без бай тарихи-мәдәни һәм рухи мирасны, милләтара һәм конфессияара тынычлыкны һәм татулыкны саклыйбыз һәм үстерәбез. Шуңа күрә 2021 ел Татарстанда Туган телләр һәм халыклар бердәмлеге елы дип игълан ителде, - дип ассызыклады ТР Президенты Рөстәм Миңнеханов.
Хәзерге вакытта Питрәч районында яшәүче барлык халыкларның телләрен һәм мәдәниятләрен саклауга юнәлдерелгән чаралар планы формалаша. Без аларны газетаның «Туган телдә сөйләшәбез» дигән яңа сәхифәсендә яктыртачакбыз.
Район мәдәният йортында беренче чара - Татарстан халыклары Ассамблеясы вәкиллегенең чыршы бәйрәме узды инде. Залда төрле милләт балалары, гаиләләре бар иде. Ә сәхнәдән аларны төрле телләрдә сәламләделәр.