ШИГЪРИ ТӘЛГӘШ

Карбыз яратам
Бакчама карбыз утырттым
Быел мин бик күп итеп.
Өлгерер өчен су сиптем,
Түземсезләнеп көтеп.
Җәйнең кызулыгы быел
Башка елдан уздырды.
Аяк басарга урын юк –
Карбызларым котырды.
Кечкенә булса да, алар
Тәгәрәшеп үстеләр.
Кайчан чират җитәр диеп,
Өзгәнемне көттеләр.
Көне буе карбыз ашыйм,
Кирәк түгел чәе дә.
Хәтеремә сеңеп калыр,
Онытылмаслык җәе дә.
Кечкенә булса да баллы,
Нигә зур булып үсми?
Ашамый торырга аны
Минем күңелем түзми.
Туйдырмый икән ул карбыз,
Мин аны бик яратам.
Ашап бетереп булмагач,
Күчтәнәчкә таратам.