Илдар Кадриев: “Мин йөрәгемне тыңладым һәм мәдәниятне сайладым”

Илдар Гали улы Питрәч авылында туа һәм гомере буе шунда яши.
Илдар Кадриев хезмәт эшчәнлеген армиядән соң финанс бүлегендә башлый. Тик шулай да бу эштән аны һәрчак мәдәният эшләре бүлдергәләп тора.
- Мине гел концертларга чакырдылар, еш кына эштән сорап китә идем. Бервакыт җитәкче мине сайлау алдына куйды – я мәдәният, я финанслар. Мин йөрәгемне тыңладым һәм беренчесен сайладым, - дип искә ала Илдар Галиевич. Үзешчән артистлар белән мәдәният йортлары булмаган авыллар буйлап концертлар куеп йөрү башлана.
1982 елда аны район мәдәният йорты директоры итеп билгелиләр. Аның җитәкчелегендә яңа иҗат коллективлары барлыкка килә, гадәти булмаган бәйрәмнәр оештырыла.
- Мин район мәдәният йортын 36 ел җитәкләдем. Кешеләр белән даими аралашып торуны яратам. Берәр чарадан соң тамашачы килеп, рәхмәт әйтсә, моннан да кадерле бүләк юк, - дип ышандыра мәдәният тармагы ветераны. – Мин бердәнбер югары белемсез мәдәният йорты директоры идем, - дип билгеләп үтә ул. Иҗатка мәхәббәт, талант хәтта иң дәрәҗәле дипломнардан да көчлерәк булып чыга.
Бүгенге көнгә кадәр Илдар Гали улы районның мәдәни тормышы белән тыгыз бәйләнештә, ул район мәдәният йорты сәхнәсендә еш чыгыш ясый, конкурсларда һәм фестивальләрдә катнаша.
- Иҗатсыз булмый, хәтта пенсиядә дә. Өйдә генә утырсам, миңа бик авыр һәм күңелсез булыр иде, - ди әңгәмәдәшебез.