Бу чара чын вакыйга булды
Татарстан пешекчеләре гильдиясе әгъзасы, Чыты авылыннан Надежда Фәхретдинова Казанда узган гадәти булмаган гастрономия чарасында катнашты. «Казан» гаилә үзәге каршындагы мәйданда танылган кондитер Ренат Әгъзамов җитәкчелегендәге 70 белгеч Россиядә иң зур чәк-чәк манарасын төзеде.
Надежда әйтә: матур кадрлар артында авыр хезмәт торган.
Манара Россиянең гастрономия рекордлары тарихына керде: аның биеклеге 10 метр 14 сантиметр, ә авырлыгы 4,5 тоннадан артык. Десерт ясау өчен ике тоннага якын он, 30 меңнән артык йомырка, 1,7 мең литрга якын бал һәм 500 килограммнан артык шикәр киткән.
Барлык катнашучыларның исемнәре, шул исәптән Надежда Фәхретдинова да, рәсми рекорд сертификатына кертеләчәк. Казанышны теркәгәннән соң, бәйрәм кунаклары танылган татар ризыгыннан авыз итә алдылар.
