Ватанның булачак сакчылары ярышты

- Җәй көне безнең десантчылар “Әлбәден” хәрби уеннары» фестивалендә актив катнашты, - диде “Десантчылар берлеге”нең ТР буенча төбәк бүлеге рәисе Юрий Суворов. – Без район җитәкчелегенә ярышларны бик яхшы шартлар булган урында үткәрү мөмкинлеге бирүләре өчен бик рәхмәтле.
Бу юлы республиканың хәрби-гамәли спорт төрләре буенча беренчелектә барлыгы җиде команда – Казан, Мамадыш, Питрәч районыннан икешәр команда һәм Тәтештән бер команда катнашты. Һәр командада - унар катнашучы. Аларга каршылыклар полосасын, комплекслы хәрби эстафетаны, укчылар көрәшен, ату,  АКМ автоматыннан атарга әзерлек нормативлары үтәргә, пычак, гранатлар ыргытырга туры киләчәк.
Безнең “Десантчылар союзы”ннан элеккеге утыз десантчы килде, алар ярышлар хөкемдарлары булачак, шулай ук алар Ватанның булачак сакчылары белән файдалы күнекмәләр белән уртаклашачак.
Программада хәрби уеннар гына түгел, викторина да, Петр Гаврилов музеена бару да каралган.
Катнашучыларның әзерлеге дә, ярышларга җаваплы каравы да сөендерә.
Мин Питрәчтә туып-үскәнмен, шуңа да якташларымның бүген безнең белән булуына шатмын, алар - район үзәгенең беренче мәктәбе һәм Шәле мәктәбе укучылары. Мондый ярышларда егетләр беренче тапкыр катнаша, шуңа да карамастан, алар үзләреннән тәҗрибәлерәк көндәшләреннән калышырга теләмәде.
- Миңа монда ошый, - диде “Спецназ” командасы командиры Ильяс Хәмзин. Безнең өчен каршылыклар полосасын узу, автоматтан ату әзерлеге, шартлы дошманга һөҗүм итү яңалык булды. Авыр, билгеле, әмма түзәрлек. Мондый чараларда алган күнекмәләр, белемнәр киләчәк тормышта кирәк булачак, бигрәк тә РФ Кораллы Көчләре сафларында хезмәт иткәндә. Десантчылар безгә коралны ничек дөрес тоту, граната ыргыту, хәрби пычаклар белән ничек эш итәргә икәнлеген күрсәтә.
Тәтешнең кадет интернат-мәктәбе командиры Анастасия Малькова барлык өч беренчелектә дә катнашкан.
- Безнең бердәм команда ике ел рәттән җиңү яулады. Быел да беренче урынны алырга тырышабыз. Без барлык нечкәлекләргә өйрәтә торган укытучы Сергей Костюнинга бик рәхмәтле. Ярышлар киеренке уза, шуңа күрә бик кызык. Барлык командалар да бик яхшы әзерләнгән. Мәктәпне тәмамлаганнан соң мин очучылар әзерләүче училищега укырга керергә телим.
Ярышлар яхшы дәрәҗәдә уза, оештыручыларга рәхмәт. Без легендар Брест крепосте сакчысы туган ягында булуыбызга  бик шатбыз.
Күп сәгатьле киеренке ярышлардан соң лидерлар билгеләнде. Казанның “Хәрби-патриотик белем бирү үзәге - 67 нче мәктәп” командасы җиңүче булды. Мамадышның “Патриот” хәрби-патриотик клубы командасы икенче урынны һәм Тәтеш кадет интернат-мәктәбе укучылары өченче урынны яулады.