Сәламәтлекнең нигезе балачакта салына

- Республика балалар клиник хастаханәсе Татарстан Республикасында яшәүчеләргә оештыру-методик һәм консультатив ярдәм күрсәтә. Без моның белән күптән шөгыльләнәбез, ә безнең сәламәтлек үзәге ачылгач тагын да киңрәк активлаштык. Безнең өчен мобиль сәламәтлек үзәге белән районнарга, авылларга чыгу матур традициягә әверелде. Табиблар составы район ихтыяҗларыннан чыгып үзгәрә. Бу хирурглар, офтальмологлар, урологлар, неврологлар һәм башкалар булырга мөмкин, ягъни теге яки бу район мохтаҗ булган барлык төр белгечләр дә килә ала. Моннан тыш, мобиль үзәкнең мөмкинлекләре безгә ультратавыш диагностикасын уздырырга мөмкинлек бирә, бездә портатив аппарат, портатив электрокардиограф бар, гомумән, балаларга сыйфатлы һәм функциональ тикшерү өчен кирәкле бөтен нәрсәбез дә бар. Без инде Питрәч районына өченче тапкыр киләбез. Күчмә бригадалар берничә юнәлештә эш алып бара. Урыннарда, мәктәпләрдә, сәламәтләндерү лагерьларында диагностика үткәрү бригадалары эшли. Аларның функцияләренә төрле куркыныч факторларны, хроник авыруларны ачыклау керә, сәламәт яшәү рәвеше мәсьәләләре буенча консультацияләр уздырыла һәм шулай ук педиатр һәм махсус җиһазлар белән консультатив кабул итү үткәрәбез. Бүген уролог, невролог һәм эндокринолог килде.
Без килгәнче әзерлек эшләре алып барыла, район педиатры безнең белгечләрнең консультациясе кирәк булган балалар исемлеген әзерли. Шул рәвешле без авыл территорияләрендә медицина ярдәмен күрсәтү мөмкинлеген тәэмин итәбез, - дип сөйләде безгә республика балалар клиник хастаханәсенең сәламәтлек үзәге җитәкчесе Гүзәл Яруллина.
- Хәзерге вакытта балаларның күбесе югары квалификацияле белгечләр консультацияләренә мохтаҗ. Әмма барысының да шәһәргә бару мөмкинлеге юк. Шуңа күрә мондый тар белгечләрнең эше авыл халкы өчен бәяләп бетергесез ярдәм булып тора. Һәр белгечнең диспансер авырулар исемлеге бар һәм бу исемлекләр буенча балаларны алдан ук әзерлибез, бу алар ата-аналары белән килә алсын һәм авыл чикләреннән чыкмыйча консультация ала алсын өчен эшләнә. Мәсәлән, бу юлы исемлектә иң зур чират урологка һәм эндокринологка булды, - дип ассызыклады халыкка медицина хезмәте күрсәтү буенча баш табиб урынбасары Наталья Ксенофонтова.
Питрәч сабыйларының әти-әниләре дә медикларның ярдәмен лаеклы бәяләде.
- Безне республика балалар клиник хастаханәсенә уролог янына җибәрделәр. Табибның үзенең монда килүе безнең өчен бик уңайлы булды, әлбәттә. Беркая да барып йөрергә кирәкмәде, - дип сөйләде Ленино-Кокушкино авылыннан Ольга Кузнецова.