Биатлонда төз ату – уңыш нигезе
Спорт сезоны кызганнан-кыза бара, Питрәч спортчылары һәр атна саен төрле ярышларда катнашалар. Наратлыкта РОСТО (ДОСААФ) оешу хөрмәтенә мәктәп укучылары һәм Казан авиация-техник көллияте филиалы арасында җәйге биатлон буенча традицион ярышлар узды.
Быел районның унбер командасыннан кырыкка якын спортчы стартка чыкты. Узган ел нибары дүрт команда гына катнашуын исәпкә алсак, бу соңгы елларда рекордлы күрсәткеч.
Ярышларда катнашучыларга ике чакрым (кызлар) һәм өч чакрым (егетләр) йөгерергә, яткан һәм баскан килеш пневматик винтовкадан атарга туры килде.
Һәр төгәлсезлек өчен 30 секунд штраф вакыт өстәлде. Бу ярышларда катнашучылар ату ярышларында бик төз булырга һәм, әлбәттә, дистанцияне тиз узарга тырыштылар.
Беренче булып стартка кызлар чыкты, беренче метрдан ук лидерлык өчен көрәш башланды. Тик барысы да ут чигендә хәл ителде. Беренче мәктәптән Ралинә Хәйриева тиз йөгереп, яхшы атты һәм нәтиҗәдә 14 минут һәм 4 секунд нәтиҗә белән беренче урынны алды. Икенче урынны Ралинәгә 17 секундка оттырган Ләйсән Гарифуллина (Ленино-Кокушкино) яулады, өченче урында район үзәгенең беренче мәктәбеннән тагын бер спортчы Мария Тимерханова, ул район чемпионына бер минуттан артык оттырды.
Егетләр арасында да призлы урыннар өчен киеренке көрәш барды. Биредә стартка егермедән артык яшь биатлончы чыкты. Шулай ук атуда тәвәккәлләп, Фаил Әхмәтшин (Шәле) нибары өч тапкыр төз атмыйча, 14.57 нәтиҗә белән беренче урынны алды. Раил Хәсәнов (Ленино-Кокушкино) Фаилгә 35 секундка җиңелеп, икенче булды. Самат Габдуллин (Татар Казысы) өченче урынны алды, ул җиңүчегә 59 секундка оттырды.
- Бүген дистанциядә чын көрәш барды, көндәшләрем дә җиңүгә лаек иде, әмма мин төз ата алдым, басып атканда гына бер тапкыр тидермәдем, һәм бу минем язмышымны хәл итте, - диде фиништан соң район чемпионы Фаил Әхмәтшин.
Колайдан алтынчы сыйныф укучысы Рәсим Шәрәфиев бу көнне иң төзе булды, ике тапкыр гына тидермәде, моңа физик әзерлек комачаулады.
Гомумкоманда зачетында беренче урында - ленинокушкинолылар, икенчедә – беренче мәктәп, өченчедә – Шәле. Калган урыннар түбәндәгечә билгеләнде: 4. Татар Казысы, 5. икенче мәктәп, 6. Кощак, 7. Колай, 8. Татар Тау Иле, 9. Богородск, 10. Иске Шигали, 11. КМТ филиалы.
Призерлар оештыручылардан истәлекле бүләкләр, грамоталар алдылар.
- Сезон башына карамастан, районның яшь спортчылары яхшы нәтиҗәләр күрсәттеләр, әмма башка ярышларда да лаеклы нәтиҗәләр күрсәтер өчен, яхшырак ату кирәк, - дип нәтиҗә ясады ярышларның баш хөкемдары, Питрәч муниципаль районы (ДОСААФ) башлыгы Илдар Бикмөхәммәтов.
Следите за самым важным и интересным в Telegram-каналеТатмедиа
