Районның яшь спортчылары уңышлары белән сөендерә

Лаешта “Хезмәткә һәм оборонага әзер” Бөтенроссия физкультура-спорт комплексының зона этабы узды. Безнең җыелма команда икенче урынны алды.
Татарстан беренчелегендә "Пестрецы-2004" хоккей буенча командасы беренче җиңү яулады. Үз бозында Сергей Мошков тәрбияләнүчеләре Әгерҗенең “Спутник” командасын 12:1 исәбе белән тар-мар иттеләр. Безнең команда һөҗүмчесе Кирилл Трайков исәпне сигезенче секундта ук ачты. Шуннан соң питрәчлеләр инициативаны кулдан ычкындырмадылар һәм көндәшләрен 12:1 исәбе белән җиңделәр. Безнең командадан Радимир Тиханов, Данил Астраханцев, Данил Воркунов һәм Илья Сергеев икешәр алка кертте. Беренче уенда безнең егетләр Казаннан “Зилант”ка 0:4 исәбенә оттырды. “Пестрецы-2010” командасы да көндәшләрен тар-мар итте, Казан беренчелеге кысаларында алар “Ак бүре” командасын 11:1 исәбе белән отты. Ә менә безнең ике команда көндәшләренә бер үк төрле 1:4 исәбе белән оттырды, “Пестрецы-2006” - “Зилант” һәм “Пестрецы-2008” (Алабуга).
Республика турнирларыннан яшь Питрәч көрәшчеләре медальләр белән кайтты, алар призлы урыннар яуладылар: Денис Волков һәм Мөхәммәдзәкәрия Батыршин көрәш буенча ярышларда беренче урын, Булат Илмәтов – өченче урын яулады. Билбау көрәше буенча турнирда Александр Петров - икенче, Ксения Демидова өченче урынны алды.