Бүген ул һөнәри бәйрәмен билгеләп үтә
Рәдис Зиннәтов бу һөнәрдә 15 ел. Аның карамагында 21 хезмәткәр һәм 19 берәмлек техника.
Һөнәргә юл
Рәдис Фәрит улы Әтнә районында туып-үскән. Тормышын авыл җирендә корырга планлаштырган, шуңа күрә аграр һөнәр сайлаган. Ул Казандагы ветеринария институтын тәмамлый һәм зоотехник була. Әтисе ындыр табагында бригадир булып эшләгән.
Аның тормыш иптәше Ленино-Кокушкино авылыннан, яшь гаилә шунда төпләнергә карар кыла. Гаилә башлыгы Питрәч районында хезмәт юлын кошчылык фабрикасында зоотехник буларак башлаган, аннары коммуналь хуҗалыкта комендант булып эшләгән, ә соңрак «Ак барс Питрәч»кә механик булып урнашкан. Ул Татар Тау Иле һәм Белкино фермаларында эшли.
Механикның көнкүреше
Механикның эш көне баш инженердан наряд алудан башлана. Шуның буенча эшлиләр. Күпме техника, кемне кая җибәрергә – ул билгели. Шул ук вакытта кайсы трактор кайсы агрегатта һәм нинди хәлдә икәнен ачыклый. Көн дәвамында эшне контрольдә тота, тикшерә.
– Берәр кайда техника ватылса – төзәтәбез, – ди ул. – Кайда нәрсә алыштырырга, кая өстәмә техника җибәрергә – барысын да күзәтәм. Кайчак үзем дә ремонтлыйм: мәсәлән, юлда тәгәрмәч ярылса – тиз арада алыштырырга кирәк, ә слесарьлар башка эш белән мәшгуль.
Техника һәркайда кулланыла: азык әзерләү, терлекне ашату, су эчертү, тирес чыгару, механизация.
– Минем бурыч – бөтен процессны техника белән өзлексез тәэмин итү, шул рәвешле тракторчылар да үз эшен башкара алачак. Бөтен парк эшләгәндә, барысы да сафта булганда күңелгә рәхәт, – дип билгеләп үтә Рәдис Зиннәтов.
Иртәдән үк ниндидер проблемаларны хәл итәргә туры килә. Югыйсә, аның сүзләре буенча, монда механикларга ихтыяҗ булмас иде. Вак-төяк эшләрне көн эчендә башкарырга тырышалар. Әгәр көйсезлекләр җитди булса, тракторны базага китерәләр. Кайчак бер атнага, кайчак өч көнгә. Ләкин озак тоткарламаска тырышалар. Заманча техниканы ремонтлау җиңелрәк. Кыенлык шунда: кайбер вакытта йөкләнеш зур.
– Төрле моментлар була. Бу күп факторларга, шул исәптән һава торышына да бәйле, – дип билгели механик. – Салкын вакытта көйсезлекне урында ук бетерү авыр. Ләкин безнең гараж җылы, ремонтлау өчен шартлар бар.
Хәзерге вакытта механизатор Александр Чернов нәкъ менә ремонт остаханәсендә мәшгуль: тракторны кышка әзерли. Кыенлыклар килеп чыкса – Рәдис Фәрит улы белән киңәшләшә.
– Баштанук аның җитәкчелегендә эшлим. Яхшы кеше. Техника турында нәрсә генә сорасаң да, үзең хәл итә алмаган нәрсә булса – аның янына барасың, ул барысын да аңлата, ярдәм итә, киңәш бирә, – ди Александр.
Рәдис Фәрит улы үзе дә кирәк булганда предприятиедәге хезмәттәшләре белән киңәшләшә. Һәркем үз участогында, ә бергә алар – бер команда.