Майор Виталий Ишимов питрәчлеләрнең тынычлыгы сагында

Бүген Россиядә һөнәри бәйрәм – Эчке эшләр министрлыгының эчке гаскәрләре көненә алмашка килгән милли гвардия гаскәрләре көне билгеләп үтелә. Бу көн саен район халкының иминлеген тәэмин итүче Росгвардия хезмәткәрләре өчен намус һәм ант бирүләре турында искә төшерү көне.

Виталий Ишимовның хокук саклау органнарында хезмәт юлы 2014 елда башлана, әмма нигезе иртәрәк салынган була. Яшь егет ашыгыч хезмәтне Пенза өлкәсенең Заречный шәһәрендә эчке гаскәрләрдә уза, анда ул мөһим дәүләт объектларын саклый. Армиядән соң Виталий тормышын тәртип саклау белән бәйләргә теләвен аңлый. Бу карарга килүенә гаиләсе тәэсир итә: ул вакытта инде участок уполномоченные булып эшләгән өлкән абыйсы Сергей аңа үрнәк була.

Виталий Ишимов полиция тарафыннан мәҗбүри сакланырга тиешле объектларны саклау юнәлеше инспекторы вазыйфасына кече лейтенант булып килә. Шул ук вакытта ул, читтән торып Казан инновацион университетына юридик факультетка укырга кереп, хезмәт үсешенә нигез сала башлый. 2018 елда ул юрист дипломы ала, бу алга таба исемнәр алу һәм вазыйфаларга билгеләнү өчен мөһим адым була.

2016 елда реформа була: ведомстводан тыш сак Эчке эшләр министрлыгы структурасыннан милли гвардия гаскәрләренең яңа төзелгән федераль хезмәте (Росгвардия) составына күчә. Виталий өчен бу вывесканың алышынуын гына түгел, ә җаваплылыкның артуын да аңлата.

– Әгәр элек без, полиция хезмәткәрләре буларак, җинаятьләрне ачу һәм профилактикалау буенча максатчан эшләгән булсак, хәзер безгә объектларны террорчылыктан саклау бурычы йөкләнгән, – дип аңлата майор.

Бүген Виталий Ишимов үзәкләштерелгән сак пункты белән җитәкчелек итә. Аның турыдан-туры буйсынуында 7 гражданлык хезмәткәре бар, ә читләтеп ул Росгвардиянең 13 аттестацияләнгән хезмәткәре эшен координацияли. Үзәк сак хезмәтенең төп бурычы – саклана торган объектлардан сигналлар кабул итү һәм аларга тиз арада реакция ясау.

Ведомстводан тыш сак шәхси сак предприятиеләреннән (ЧОП) һәм ведомство сагыннан дәүләт хезмәте статусы белән генә түгел, вәкаләтләре белән дә аерыла. Ведомстводан тыш сак хезмәткәрләре утлы корал куллануга хокуклы, махсус сигналлар кушылган очракта юлларда өстенлек һәм хокук бозучыларны тоткарлау хокукына ия.

– Экипажлар һәрвакыт маршрутта, – диләр хезмәттә. – “Тревога” сигналына җавап бирү кичекмәстән булырга тиеш.

Виталий Александрович тоткарлау төркемнәре эшен оештыра. Нигездә ул тоткарлауларга үзе сирәк чыга, игътибарын координацияләүгә һәм контрольгә юнәлтә, нәкъ менә аның шөгыльләре эш нәтиҗәлелегенә турыдан-туры кагыла. Хезмәткәрләр юридик яктан оста итеп административ һәм җинаять эшләре буенча материаллар җыярга, объектларны дөрес карарга һәм кораллы каршылык күрсәткәндә тиешенчә эш итәргә өйрәнәләр.

– Вак-төяк хокук бозуларны исәпкә алмаганда, елына 20гә якын җитди хәл була, – дип статистика белән уртаклаша майор. – Бу үтеп керүләр, урлаулар. Тоткарлауларны кайнар эзләр буенча башкарырга тырышабыз.

Хәзер социаль объектларның иминлегенә аерым игътибар бирелә. Хөкүмәтнең 1006 нчы карары нигезендә, мәктәпләр заманча инженер-техник чаралар белән җиһазландырылырга тиеш. Ишимов бу таләпләрнең үтәлешен контрольдә тота, монда хаталануның нинди нәтиҗәләргә китерүен яхшы аңлый.

Районның иминлеге – комплекслы эш. Ведомстводан тыш сак бүлеге Эчке эшләр министрлыгы, Гадәттән тыш хәлләр министрлыгы, район хакимияте, балигъ булмаганнар эшләре буенча комиссияләр белән тыгыз хезмәттәшлек итә. Уртак күчмә тикшерүләр үткәрелә, анда һәр ведомство объектка үз юнәлеше буенча карый, әмма максат бер – гадәттән тыш хәлләргә юл куймау.

– Безнең эш объектларны саклауның ышанычлылыгы һәм урлауларга юл куймау, шулай ук вакыйга урынына вакытында килеп җитү буенча бәяләнә, – дип билгеләп үтә Виталий Александрович.

Майор Ишимовның формасы һәм эш көннәре артында ышанычлы тылы бар. Ул 2021 елда өйләнгән, тормыш иптәше Марина. Гаиләдә өч яшьлек уллары Егор үсә. Әлегә династиянең дәвамы турында сөйләргә иртәрәк, әмма әти үрнәге күз алдында.

Хезмәттән буш вакытын Виталий Александрович гаиләсенә багышлый. Күптән түгел гаилә яңа йортка күчкән, аны үз көчләре белән төзегәннәр.

– Төзелеш эшендә дә осталык бар, ансыз булмый, – диде ул. Пенсиягә кадәр майорга алты ел чамасы калып бара. Ул югары дәрәҗәләр артыннан кумый, аның өчен биредә, Питрәч районында үз эшен сыйфатлы итеп башкару принципиаль мөһим.

Милли гвардия гаскәрләре көнендә Виталий Александровичка һәм аның хезмәттәшләренә сәламәтлек, хезмәтләрендә уңышлар, ышанычлы тыл телисе килә. Аларның көндәлек, ләкин мөһим хезмәте – безнең тынычлык гаранты.