Марат Җәббаров Питрәч районында булды

Татарстан Республикасы Премьер-министры урынбасары – Татарстан Республикасы Авыл хуҗалыгы һәм азык-төлек министры Марат Җәббаров безнең районда булды.

Марат Җәббаров визитының максаты авыл хезмәтчәннәренең язгы кыр эшләренә әзерлеген бәяләү, төзелә торган объектларны карау һәм хуҗалыклар җитәкчеләре белән очрашу иде. Аны район башлыгы Рәис Сөләйманов озата йөрде.

Сәфәр вакытында төп игътибарны техниканы әзерләүгә һәм чәчү компаниясе өчен ресурслар туплауга бирделәр. Марат Җәббаров “Агролак-К” ҖЧҖнең һәм “Ак Барс Питрәч” ҖЧҖнең машина-трактор паркларында булды, аларда күрсәтмә техник карау узды.

Районның авыл хуҗалыгы һәм азык-төлек идарәсе башлыгы Фәрит Галимов белешмәләре буенча, районның язгы чәчүгә әзерлеге 84 процент тәшкил итә. “Агролак-К” ҖЧҖнең сөрүлек мәйданы – 3 204 гектар, тракторларның әзерлеге – 93 процент, чәчү комплексларының әзерлеге – 100 процент. Запас частьләр 100 процент сатып алынган. “Ак Барс Питрәч” ҖЧҖдә планлаштырылган чәчү мәйданы – 16 919 гектар (шуның 12 000 гектары язгы чәчү). Техника 93 процентка әзер, орлык белән хуҗалык тулысынча тәэмин ителгән. 2025 елда “Ак Барс Питрәч” хуҗалыгы 53,4 млн сумлык 17 берәмлек техника сатып алган.

Хуҗалыклар җитәкчеләре, инвесторлар һәм авыл җирлекләре башлыклары белән очрашу барышында Марат Җәббаров агымдагы сезонга эшнең төп юнәлешләрен билгеләде. Министр чыгымнар структурасын яңадан карау һәм продукциянең үзкыйммәтен киметү зарурлыгын ассызыклады.

– Ашламалардан, сыйфатлы орлыклардан, заманча техникадан башка яхшы уңыш алып булмый. Нәтиҗәлелекне кайда яхшыртырга икәнен карарга кирәк, – диде Җәббаров.

Ул шулай ук республикада чәчү әйләнеше структурасында дәвам иткән үзгәрешләр турында искәртте: бөртекле культуралар өчен мәйданнар кими, майлы культуралар өчен мәйданнар арта. Аграрийларга, печән һәм салам әзерләүне дә кертеп, экспорт юнәлешләрен карарга тәкъдим ителде.

Эпизоотик хәлгә аерым игътибар бирделәр. Министр күрше республикаларда пастереллез белән кискен хәл турында кисәтте (аерым алганда, Удмуртиядә комплексның ябылуы һәм Чувашиянең Батыр районындагы проблема турында сүз бара).

– Ветеринария куркынычсызлыгы мәсьәләсен аерым контрольдә тотарга кирәк. Без бруцеллез аркасында 2 ел элек миллиардлаган зыян күрдек. Әгәр милек иминиятләштерелмәгән икән – зыянны беркем дә капламый, – дип кисәтте ведомство башлыгы.

Питрәч районы башлыгы Рәис Сөләйманов игътибарны җирләрдән нәтиҗәле файдалануга һәм кооперацияне үстерүгә юнәлтте.

– Без эшкәртелми торган җир кишәрлекләрен тартып алачакбыз һәм эшләргә теләгән эшмәкәрләргә мөмкинлекләр тудырачакбыз. Иң мөһиме – продукцияне сату, ә безнең сату базары бик яхшы – Казан, – дип белдерде район башлыгы.

Ул шулай ук министрның ветеринария куркынычсызлыгы турындагы сүзләрен хуплады, инфекцияләр кертү куркынычын һәм терлекләр кертүне катгый контрольдә тоту кирәклеген билгеләп үтте.

Авыл хуҗалыгы һәм азык-төлек идарәсе башлыгы Фәрит Галимов, министр район күрсәткечләреннән канәгать калды, дип билгеләп үтте.

– Визит безне стимуллаштыра, илһам бирә. Марат Азат улы яхшы бәя бирде. Безгә бары тик эшләргә һәм алга барырга гына кала, – дип йомгаклады Галимов.