Питрәч балалар сәнгать мәктәбе укытучысы Людмила Шошунова: «Югары үрләргә ирешергә була»

Питрәч балалар сәнгать мәктәбенең гитара укытучысы Людмила Шошунова “Ел хатын-кызы” конкурсының зона этабында “Рухият һәм мәдәният” номинациясендә ышанычлы җиңү яулады. Әмма бу уңыш артында талант кына түгел, ә музыкага, гаиләгә һәм балаларга багышланган гомер тора.

Людмила Шошунованың Биектау районындагы зона этабында ясаган чыгышы үзенең ихласлыгы һәм гадәти булмаган форматы белән жюри һәм тамашачыларның исендә кала. Башка катнашучылар үзләре турында монологлар һәм презентацияләр аша сөйләгәндә, Людмила сәхнәне иҗат киңлегенә әйләндерә.

– Без гадәти булмаган форматта чыгыш ясадык, чөнки мин тормыш иптәшемне, улымны һәм балалар сәнгать мәктәбенең балалар оркестрын җәлеп иттем, – дип сөйли Людмила Шошунова.

Ире Владимир үзенең агачтан уеп кулдан эшләнгән кәнәфиен тәкъдим итә, Людмила анда тәхеттә утырган кебек утыра. 7 ел скрипка классында укучы улы Даниил сольный партияне лаеклы башкара. Ә гаиләгә ярдәм итәргә Людмиланың балалар оркестры чыга.

– Шул чакта жюри уянып киткәндәй булды, мондый гадәти булмаган театраль-музыкаль чыгыш аларның игътибарын җәлеп итте, – ди җиңүче.

Людмила үзенең коллегаларына рәхмәтле, алар аны әзерлек вакытында һәм анда баруда хуплаганнар. Скрипка классы укытучысы Наталья Хәлимова Даниил Шошуновның чыгышын әзерләгән. Эльвира Цыганова концертмейстер сыйфатында сәхнәдә Даниил белән чыгыш ясый, фортепиано партиясен уйный. Шулай ук балаларны, аларга рухи яктан булышып, күзәтеп тора. Район мәдәният бүлеге җитәкчесе Ирина Сәлахова конкурста катнашу инициаторы булып кына калмыйча, автобус белән дә тәэмин итә.

Людмила Шошунова биографиясе – үз эшенә тугры музыкант һәм педагогның классик юлы. Тумышы белән Югары Ослан районыннан, Түбән Кама музыка көллиятендә музыкаль белем ала (баян классы), аннары Казан педагогика университетының музыка факультетын тәмамлый.

Җиде ел элек Людмила Питрәч районына күченгән. Монда ул эшкә энтузиазм белән тотына.

– Музыка бүлегенең үсешен тизләтү, тагын да күбрәк балаларны җәлеп итү өчен без зур ансамбльләр оештыра башладык, – дип сөйли ул.

Педагогның төп казанышы – балалар оркестры. Коллективта 8 яшьтән башлап төрле яшьтәге 25 бала. Инструментларны: баяннар, металлофоннар, ксилофоннар, бас-балалайкаларны грантлар ярдәмендә сатып алганнар.

Оркестр репертуары – ул классика һәм заманча әсәрләр. Балалар Салих Сәйдәшев, Михаил Глинка, Дмитрий Шостакович әсәрләрен, совет чоры музыкасын (Евгений Крылатов) уйныйлар.

– Музыка – ул беренче чиратта күңелне чистартырга тиешле фактор. Әгәр моңа иҗади яктан карасаң, моны бары тик музыка гына бирә, – дип ышана Людмила Шошунова.

Аның укучылары бу сүзләрне раслыйлар. 2 нче гитара классы укучысы Арсений Сомов дәресләр зур тырышлык таләп итүен әйтә:

– Башта авыр булды, аккордларны кысканда бармаклар авырта. Ләкин акрынлап өйрәнәсең. Барыннан да бигрәк яңа көйләр ошый, – дип сөйли яшь музыкант.

Арсений шулай ук конкурска баруын искә ала:

– Барганда безгә күңелле булды, җырладык та, уен коралларында да уйнадык. Беренче урын алдык, монда безнең өлешебез бар, дип саныйм.

Людмиланың уңышы якыннары ярдәменнән башка мөмкин түгел. Ире Владимир белән алар Югары Осланда Идел буенда халык бәйрәмендә танышалар. Хәзер алар – иҗади тандем. Иренең “Мәдәнияттәге казанышы өчен” күкрәк билгесе бар, ә аның агачтан уеп ясаган эшләнмәләре тамашачыларны сокландыра.

Улы Даниил династияне дәвам итә. Ул оркестрда уйнап кына калмый, ә әнисен үзенең иҗаты белән дә илһамландыра.

– Яныңда сиңа ярдәм итеп торучы яраткан кешеләрдән торган тулы бер команда булганда – югары үрләргә ирешергә була, – диде Людмила.

Җиңүенә карамастан, Людмила Владимировна үзенең казанышлары белән мактанмый. Аның өчен конкурслар – ул эш процессы. Иң мөһиме – дәвамлылык.

– Минем гитарачылардан берәрсенең музыкант һөнәре буенча китүен, әти-әни теләге буенча түгел, ә минем кебек рухи омтылыш буенча баруын бик теләр идем. Мин пенсиягә киткәндә, урыныма үз укучыларым килсен иде, – ди педагог.

Аның зур хыялы бар, ул Питрәчтә сыйфатлы музыка уен кораллары белән бик шәп, уңайлы музыка мәктәбенең аерым бинасын төзүләрен тели. Анда укырга бару үзе зур бәйрәм кебек булыр иде, ди.

Якын арада Людмила Шошунованы Казанда Республика конкурсының финалы көтә. Алда яңа тур, яңа чыгышлар һәм, бәлки, яңа җиңүләр. Әмма нәтиҗәсенә карамастан, ул инде төп бүләкне – укучыларның һәм тамашачыларның мәхәббәтен яулаган.