Питрәч районында ике сугыш ветераны яши

Безнең районда ике Бөек Ватан сугышы ветераны яши. Бу Яңа Шигали авылыннан 99 яшьлек Алексей Макаров һәм Кощак авылыннан 98 яшьлек Рияз Мәхмүтов. Алар Бөек чорның ике герое.

Алексей Макаров балачактан ук югалту ачысын татыган: сугышка башта әтисен, аннары абыйсын алалар. Ул тылда ачлы-туклы, алны-ялны белми эшли, ә 1943 елда үзе дә кулына винтовка ала. Яшь солдат 1 нче Украина фронтында сугышкан, ә Висланы кичкән өчен Кызыл Байрак орденына лаек булган. Бу зур батырлык өчен бирелгән бүләк. Солдат өенә, туган якларына 1951 елда гына кайта. Тыныч тормышта үзен ветеринариядә таба – терлекләр дәвалый, хуҗалыкларны коткара. Аның картлыгы тыныч матур тормышта уза: янында гомер иткән тормыш иптәше Прасковья Ивановна. Әти-әниләренә якынрак булыр өчен, якында гына улы Владимир йорт җиткергән. Макаровларның аларның нәселен лаеклы дәвам итүче дүрт баласы бар.

 Рияз Мәхмүтов армиягә 1944 елда алынган, бу инде Җиңү якынлашкан, әмма әле сугыш тәмамланмаган чак була. Өйрәнүләрдән соң аны Брестка ватык хәрби техниканы төзәтергә, аны сафка кайтарырга җибәрәләр. Ә җиңүдән соң ул үзенең бөтен күңелен балаларга багышлый – 45 ел буе мәктәптә эшли. Балаларга предметны өйрәтеп кенә калмый, ә үзе сугыш аша кичергәннәрне аңлата: намус, сүзгә тугрылык, Ватанга чиксез мәхәббәт. Бүген Рияз Мәхмүт улы кайгыртучан кызы Альбина белән яши. Йөрәгендә бергә гомер иткән хатыны Роза Муфазаловна турында якты истәлекләрен саклый. Ул да укытучы булган, дүрт бала үстергәннәр.

Бүген, чал чәчле геройларыбызга карап, безнең алда ветераннар гына түгел, ә тере тарих булуын аңлыйбыз. Алар безнең белән булганда, безгә тормыш бүләк иткәннәре өчен әле рәхмәт әйтергә өлгерә алабыз.