Питрәчтә Мелиораторов урамындагы икенче йортта нәрсәләр үзгәрәчәк

Питрәчтә беренче мәктәп каршында урнашкан күпфатирлы йортта капиталь ремонт башланды. Үтеп баручылар һәм биредә яшәүчеләр әлегә түбәдәге эшне генә күрә, әмма алда бинаны комплекслы яңарту көтелә.

Йортка язгы яңгыр үтмәсен өчен, түбәләрне сүтеп, этаплап яңарталар: бер участокны ачалар һәм ябалар, аннары икенчесенә күчәләр. Һава торышы фаразын катгый күзәтәләр.

– Түбә тулысынча алыштырылачак, – дип аңлата прораб Виталий Кокуев. – Без иске калайны куптарып алдык, кайчылыкларны алдык – яңасын ясыйбыз. Аннары башта җилдән саклагыч материал һәм калай белән ябачакбыз.

Түбәдән сулар агызу өчен, боз сөңгеләре барлыкка китерми торган яңа система урнаштырылачак. Шулай ук фасад җылытылып, декоратив штукатурка белән яңартылачак, йорт тирәли отмостка ясаячаклар.

– Түбә начар хәлдә иде, борыслар кырыеннан су ага иде, – дип сөйли икенче катта яшәүче Валерий. – Без фатирны күптән түгел генә сатып алдык. Түбәгә ремонт ясалачагын белә идек. Шулай ук аны җылыту да кирәк. Күпкә җылырак булыр дип өметләнәбез, чөнки кыш көне бик салкын булды. Котел максимумда эшләде.

Фасадка түбә ябу эшләре тәмамланганнан соң керешәчәкләр. Шулай ук подъездны ремонтлау да планлаштырылган. Эчке инженер системаларына (электр, канализация, су, газ) ремонт ясалачак. Бу гомумйорт милкенә кагыла – фатирларга төзүчеләр керми. Ремонт җәй ахырына кадәр төгәлләнәчәк.

Куркынычсызлыкка аерым игътибар бирәчәкләр. Татарстанда газ белән агулану очраклары ешаю сәбәпле, барлык вентиляция каналларын һәм төтен юлларын чистартачаклар. Хезмәт итү вакыты 30 елдан арткан фасад газүткәргечен шул ук сәбәп белән алыштырачаклар.

– Ремонт күп фатирлы йортларны капиталь ремонтлауның төбәк программасы буенча бара, – ди район башкарма комитеты җитәкчесе урынбасары Рамил Шәйхетдинов. – Ул Татарстан Республикасының тораккоммуналь хуҗалыгын реформалаштыру фонды аша гамәлгә ашырыла. Акчалар һәр квадрат метрдан капремонт өчен гражданнар җыемнарыннан, шулай ук муниципалитет һәм республика өлешләреннән туплана. 2040 елга кадәрге озак сроклы программа бар, аңа районның барлык йортлары да кертелгән, һәм якындагы өч елга кыска сроклы программа да бар. 2026 елда өч еллык программаның яңа этабы башланды.