Питрәчтә Сабантуйның абсолют батыры яңа автомобиль алачак

Шимбә көнне, 6 июньдә, Питрәч наратлыгында Сабантуй узачак. Башлана 11 сәгатьтә.

Кунакларны бай программа көтә. Театральләштерелгән тамаша, авыл хуҗалыгы алдынгыларын хөрмәтләү, ярминкә һәм күргәзмә булачак. Спорт ареналарында милли уеннар, билбау көрәше буенча ярышлар һәм ипподромда ат чабышлары узачак. Бәйрәм зур концерт белән тәмамланачак.

Сабантуйның абсолют батыры төп призны — «Лада Гранта» автомобилен алачак.

Бәйрәмгә чакырылган кунаклар — танылган татар артистлары Айдар Галимов һәм Ришат Төхвәтуллин.