Рөстәм Миңнеханов Питрәч районында булды

Питрәч районында Татарстан Республикасы Рәисе Рөстәм Миңнеханов булды. Аны Татарстан Республикасы Премьер-министры урынбасары – Татарстан Республикасы Авыл хуҗалыгы һәм азык-төлек министры Марат Җәббаров һәм Питрәч районы башлыгы Рәис Сөләйманов озата йөрде.

Колай авылы янындагы “Агролак-К” ҖЧҖнең күпьеллык үләннәр кырында район башлыгы Татарстан Рәисенә язгы кыр эшләренең барышы турында сөйләде. Быелгы уңыш өчен сабан культураларын чәчү 32,5 мең гектар мәйданда планлаштырылган, эшләр 24,5 процентка башкарылган. 22 берәмлек чәчү агрегаты эшли. Тырмалау тәмамланып килә.

Терлекчелеккә килгәндә, мөгезле эре терлекләр, шул исәптән сыерлар саны кимегән. Ләкин савым арту исәбенә сөт җитештерү арткан.

Марат Азат улы авыл хуҗалыгы тармагына ярдәм итүгә юнәлдерелгән программаларда активрак катнашырга өндәде. Рөстәм Нургалиевич ассызыклаганча, районда кече һәм урта эшмәкәрлек өлеше 35 процент тәшкил итә – бу яхшы күрсәткеч. Ул шулай ук районны уңай демографиясе, халык саны артуы һәм туучылар саны артуы өчен мактады.

Кунакларны җирле эшмәкәрләр тәкъдим иткән авыл хуҗалыгы продукциясе күргәзмәсе белән таныштырдылар: кошчылык, чәчәк үстерү, бакчачылык продукциясе, казылык эшләнмәләре, сөт продукциясе, бал һәм башкалар. Олан Иле авылыннан КФХ башлыгы Анастасия Александрова тере кош-корт: йомырка салучы тавыклар, каз бәбкәләре, бройлер чебиләр һәм үрдәкләр тәкъдим итте. Богородск авылыннан теплица комбинаты җитәкчесе Альбина Сафина чәчәкләрнең төрле төрләрен күрсәтте.

– Яз уяну белән без кешеләргә матурлык бүләк итәбез. Күпчелек скверлар, йорт яны территорияләре, бакча участоклары һәм предприятиеләр мәйданнары безнең чәчәкләр белән бизәлгән, – диде ул. Комбинатта лаләләр, берьеллык чәчәкләр, чүлмәк гөлләре, шулай ук томатлар үстерәләр.

Аннары Рөстәм Нургалиевич районда ачылган компаниянең техника күргәзмәсен карады: үзебездә һәм чит илдә җитештерелгән үзйөрешле сиптергечләр, шулай ук ашлык җыю комбайннары. Инде бу сезонда аларны кырларда эшләү өчен арендага бирә башлаячаклар. Масштаблы проект кысаларында монда машина-трактор комплексы төзеләчәк.

– Техника авыл хуҗалыгы товар җитештерүчеләре өчен билгеләнгән, алар яхшы һава шартларында барлык агрооперацияләрне вакытында башкарып чыгарга өлгерсеннәр өчен, – дип билгеләп үтте генераль директор Ян Клетенков.

Татарстан Рәисе хуҗалыклар җитәкчеләренә, инвесторларга, авыл җирлекләре башлыкларына һәм район активына мөрәҗәгать итеп, авыл хуҗалыгы өлкәсендә дә, инфраструктурада да территорияләрне комплекслы үстерү кирәклеген билгеләп үтте.

– Районның потенциалы яхшы. Барлык мөмкинлекләр дә бар, барлык программалар да эшләячәк. Сезгә уңышлы һәм нәтиҗәле эш телим. Җирнең һәр гектарына сакчыл карагыз, – диде Рөстәм Миңнеханов.

Шул ук вакытта ул СВОда катнашучыларга һәм аларның гаиләләренә ярдәм итүнең мөһим бурыч булуын ассызыклады.

ФОТОРЕПОРТАЖ