Әзерлек яхшы, урак башланганны гына көтәбез
Уракка төшәргә дә санаулы көннәр калып бара. Район комбайнчылары, аларның ярдәмчеләре, механизаторлар, ындыр табагы хезмәткәрләре яңа уңышны җыеп алырга әзерләнә. Белгечләр һәм игенчеләр сүзләренә караганда, быел иген мул. Районда, гадәттәгечә, урак алдыннан комбайннар парады башланды. Район һәм Авыл хуҗалыгы министрлыгы белгечләре комбайннарның әзерлеген тикшерергә кереште. Алар үз эшләрен Шәле авылы хуҗалыгыннан башлады.
– Минем комбайным районда иң искеседер, мөгаен, – диде районның иң алдынгы комбайнчыларының берсе “Рацин Шәле” ҖЧҖтән Фәрдүс
Миндубаев. – Мин инде унтугызынчы сезон үземнең “Дон–1500Б” комбайнында туган авылым иген басуларына чыгам.
Ярдәмчем, Фәнис Сәйфуллин белән аны яхшылып ремонтладык, без хәзер үк кырга чыгарга әзер. Быел да комбайныбыз сынатмас һәм без кабат лидерлар арасында булырбыз, дип өметләнәм.
– Соңгы ремонт эшләре бара, вак-төяк эшләр генә калды, комбайн уракка әзер инде, – диде районның һәм хуҗалыкның иң тәҗрибәле, алдынгы механизаторы Фәрит Нуриев.
- Безнең хуҗалыкта быелгы урып-җыю эшләрендә барлыгы алты комбайн катнашачак, дүрт “Акрос” һәм ике “Дон”. Бүген алар барысы да тикшерүне уңышлы үтте, кырда да сынатмаслар дип өметләнәм. Запчастьлар бар, комбайнчыларыбыз да тәҗрибәле, безнең төп бурыч – уңышны вакытында, югалтуларсыз җыеп алу, – диде хуҗалыкның баш инженеры Ислам Гайнетдинов.
Шәледә комбайннарны җентекләп тикшергәннән соң, тикшерүчеләр күрше Колай авылындагы хуҗалыкка юл алды, анда да барлыгы алты комбайн – дүрт “Нива” һәм ике “Полесье” сынау үтте.
Ашлык җыю комбайннарын кабул иткәндә урак вакытында ашлык югалтуга юл куймас өчен герметиклыкны тикшерүгә зур игътибар бирелә. Болардан тыш белгечләр комбайнчыларның машина йөртү таныклыкларын, техник талоннарын, аптечкаларын, янгын сүндергечләрен, яктылык приборларының төзеклеген, тормоз системасын, агрегатлар көйлелеген һәм башкаларны тикшерә.
– Ашлык җыю техникасы әзерлеген тикшерү бөтен республика буенча башланды, – диде Татарстан Республикасы Авыл хуҗалыгы министрлыгының техник кораллану буенча сектор мөдире Ян Клетенков. – Без тикшерүне сезнең районнан башларга булдык, бүгенгә комбайннарны тикшерү буенча комиссия аларның торышыннан канәгать. Әлбәттә, җитешсезлекләр дә бар, алар зыянлы түгел, Питрәч комбайнчылары аларны урак башланганчы көйләп бетерер, дип уйлыйм. Комиссия әзерлекне 95 процент дип бәяләде. Иң мөһиме, без җитешсезлекләрне ачыклыйбыз, нәрсә эшләргә кирәклеген әйтәбез. Берникадәр вакыттан соң комбайннарны кабат тикшерәчәкбез, шул вакытта районда барлык техника эшкә йөз процент әзер булыр, дип ышанам, - ди ул.
– Быел безнең кырларда 32200 гектардан уңыш җыеп алырга кирәк булачак, – диде район авыл хуҗалыгы һәм азык-төлек идарәсе башлыгы Ирек Сабиров. – Район буенча бер комбайнга уртача нагрузка 450 гектардан аз гына артыграк туры килә.
Бүген тикшерүчеләр кайбер җитешсезлекләрне ачыклады, алар зур түгел, уракка барлык комбайннар да әзер булачак. Аңа кадәр әле контроль суктыру булачак. Без августның беренче көннәреннән уракка төшәргә планлаштырабыз, синоптиклар кызу көннәр вәгъдә итә, башаклар да өлгереп бетәчәк.
Безнең өчен беренче урында кеше факторы тора, техника белән, искеме ул, яңамы, кеше идарә итә бит. Шуңа күрә техника куркынычсызлыгына зур игътибар бирергә кирәк. Һәркемгә дә кырлардагы игеннәрне вакытында, югалтуларсыз, сыйфатлы җыеп алуларын телим, - диде ул.
Комбайнчыларның кәефләре яхшы, карарлары нык, яңа уңыш өчен көрәштә алар бирешергә җыенмый.
Следите за самым важным и интересным в Telegram-каналеТатмедиа
