Алга

Питрәч районы

18+
Рус Тат
2024 - год Семьи
Сәламәтлекне саклау

Кощак авылы амбулаториясендә ярты ел инде даими педиатр юк

Аның булмавы атааналарны борчуга салды, зур мәшәкатьләр тудырды.

Шушы авылда яшәүче Алексей Афанасьев дүрт бала атасы. Алар бер яшьтән унбер яшькә кадәрге балалар. Гаиләгә балаларны үзләренә дәваларга яки түләүле табиблар янына шәһәргә барырга туры килә.

– Педиатрны өйгә чакыру бөтенләй мөмкин түгел. Белешмә алу да алар өчен зур мәшәкатькә әйләнә. Бала авырып киткән саен, танышлар аша табибларга язылу юлларын эзлибез, кайвакыт шәхси клиникаларга акча сарыф итәбез, – дип зарлана ул.

Авылның тагын бер кешесе Людмила Пучкинаның ике яшьлек баласы пневмония белән авырый. Температура күтәрелгәч, ашыгыч ярдәм чакырганнар. Хатын-кыз әйтүенчә, табибларны ярты көн көтәргә туры килгән. Монда табиб булса, авыруны башлангыч стадиядә туктатып булыр иде, дип саный ул.

– Педиатр тиешле ярдәм күрсәтер, дөрес диагноз куяр иде, без кирәкле табибка тизрәк эләгә алыр идек. Бу авыруның нәтиҗәләре әле дә сиздерә, – ди ул.

Амбулаториягә һәр сишәмбе һәм җомга район хастаханәсеннән педиатрлар килә. Ләкин аларга эләгү авыр. Мондый хәл аркасында яшь ана Миләүшә Габдрахманова кызына бер генә планлы прививка да ясата алмаган, ә аңа тиздән бер яшь тула.

- Алдагы педиатр башта авырган, аннары отпускка киткән, ә аннан соң бөтенләй эштән киткән. Хәзер атнага ике тапкыр төрле педиатрлар кабул итә. Ләкин чиратта бик күп кеше тора, анда көне буе торырга туры килә. Анда авырулар да, сәламәт кешеләр дә бар: аннан соң без гел авырыйбыз. Ә прививканы сәламәт балага гына ясарга мөмкин. Миңа Званкага барырга киңәш итәләр. Ләкин ирем эш көннәрендә эшли, ә мин машина йөртмим. Әгәр такси чакырсаң, үзең белән балалар креслосын күтәреп йөрергә туры киләчәк, – диде зарланып Миләүшә.

"Земский доктор" программасы бар, анда авыл табибларына бер тапкыр миллион ярым сум күләмендә түләү каралган. Бу акчаны алганда яшь белгеч биш ел эшләргә тиеш. Ләкин бу вакыт узгач, практик тәҗрибә туплаган табиблар шәһәргә күченәләр. Элекке табиб бу программа буенча акча алган, әмма мәҗбүри биш еллык хезмәт эшчәнлегеннән соң киткән. Узган ноябрьдән аның урыны бушаган.

Район үзәк хастаханәсендә проблема турында беләләр һәм аны хәл итү өчен бар көчләрен куялар. Социаль челтәрләрдә белдерүләр урнаштыралар, әңгәмәләр оештыралар. Ләкин теләүчеләр әлегә юк.

– Табиб тик торганнан гына китмәде. Башта аның шәфкать туташы хезмәт хакы аз булганлыктан эштән китте. Педиатр булдыра алганча эшен алып барырга тырышты, аннары эштән китте. Ләкин без бу участокны ташламадык. Әлбәттә, кабул итү бик зур, балалар бик күп. Участокны алып бару авыр, – дип сөйләде балалар поликлиникасы бүлеге мөдире Гүзәл Агафонова. – Барлык өстәмәләр белән район педиатрларының хезмәт хакы 35-40 мең сум тәшкил итә. Яшь белгечләрне саклап калу өчен өстәмә ярдәм кирәк, – дип саный ул.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса