Лидерлыкка «Олимп» һәм «Ред Булл» чыкты
Авыл яшьләре арасында район чемпионатының дүртенче тур уеннары көтелмәгән нәтиҗәләр китермәде. Хәер, бер уенда 28 туп кертелде. Күңелле һәм нәтиҗәле футболны «Фантом» – «Френдшип» матчы уенчылары күрсәтте, анда «Френдшип» 17:11 исәбе белән җиңү яулады. Данис Зарипов («Фантом») 5 туп кертте; Ибраһим Исмәгыйлев һәм Иван Никитин (икесе дә – «Френдшип») шулай ук 5шәр туп кертте, өстәвенә Иван тагын 4 гол пасы бирде.
«Арарат» бу турга кадәр чемпионатта очколарын югалтмаган бердәнбер команда булып калды. Әмма бу турда алар «Илай»га 3:5 исәбе белән оттырды.
Хәзер лидерлыкка «Олимп» һәм «Ред Булл» чыкты, аларның 10 очкосы
бар. Тагын дүрт команда 9 очко җыйды һәм 3-6 нчы урыннарны бүлешә.
«Олимп» «Алгоритм»ны 4:1 исәбе белән җиңде. «Ред Булл» кырга чыкмыйча өч очко яулады: көндәше «Фортуна» уенга килмәде, һәм аларга 0:5 исәбе белән техник җиңелү язылды. «Ленино» «Балтика»ны 3:1 исәбе белән җиңде. Шундый ук исәп белән «Ман Сити» «Фамили»ны җиңде. «Виктория» «Синара»ны 7:1 исәбе белән тар-мар итте.
Әлегә чемпионатта «Ф» хәрефеннән башланган өч команданың активында очколар юк: болар – «Фамили», «Фортуна» һәм «Фантом».
Иң яхшы снайперлар шулай ук ике уенчы – 11әр туп керткән Матвей Маньков («Олимп») һәм Камил Нуриев («Балтика») алда бара. Бомбардирлар арасында шулай ук ике уенчы: Рамазан Кәримов («Илай») һәм Камил Нуриев 16 балл җыйдылар. Рамазанда – 9 гол + 7 пас, Камилдә – 11 + 5.
