Әминә апа Габдуллинаны Питрәч төбәгебездә белмәгән кеше сирәктер. Апакай авылында яшәүче мөхтәрәм затка шушы көннәрдә 85 яшь тулды.
Гомере буе халыкны мәдәни-агарту белән шөгыльләнгән Әминә апа пенсиягә чыкканнан соң да гомерен бушка уздырмый. Төбәгебездә беренчеләрдән булып халыкка дин дәресләре бирә башлый ул. Апакай мәчетендә башлап бәйрәмнәр оештырып йөрүче дә ул була. Гомерен халыкка хезмәткә багышлаган ханым бар эшне дә үзе башлап йөри. Инде тугызынчы дистәсен вакласа да, бүген дә бар максаты - кешеләргә яхшылык, иман, мәгърифәт нуры өләшү.
Язмыш Әминә апаны төрлечә сыный. Чистай төбәге Мөслим авылында туып-үскән кыз Мәгъсүм исемле егеткә яратып кияүгә чыга. Ләкин аларның бәхетле тормышлары кыска гомерле була. Биш кенә ел бергә торып кала алар. Мәгъсүм комбайн астында калып һәлак була. Әминә ике бала белән тол кала. Башка кияүгә чыкмый ул, әнисенең киңәшен тота. Балаларын да ятим итәсе килми. Бар тормышын эшкә багышлый. Әти-әнисен тәрбияләп соңгы юлга озата. Алар үлгәннән соң туган авылында каласы килми, йорт-җир дә искергән. Апакай авылындагы кошчылык фабрикасы клубына мөдир кирәк, фатир да бирәселәр икән, дигән хәбәрне ишетә дә тәвәккәлләп юлга кузгала. Авылның ярты халкы рус милләтеннән булгач, аларны да клубка җәлеп итәр өчен чеп-чи татар хатынына рус вокаль ансамбле дә оештырырга туры килә. Эшен шулкадәр бирелеп, җиренә җиткереп башкара, аны лаеклы ялга чыгар вакыт җитсә дә, аны җибәрмиләр, җиденче дистәсендә генә лаеклы ялга чыга ул. Фабрика аңа бер бүлмәле фатир бирә. Казанга якын яшәүнең уңайлыклары күп була. Ике баласы да югары белем ала, гаилә кора. Олы улы гына 58 яшендә йөрәк өянәгеннән үлеп китә.
Әминә апа бүген кызы Роза, кияве Рөстәм тәрбиясендә яши. Аларның да дин юлында булуларына сөенеп бетә алмый. Һәр иртәсен балаларына, оныкларына, авылдашларына, якыннарына исәнлек, иминлек теләп башлый ул. Ак әбинең теләкләре дә кабул килә тора. Балалары аның фатихасы белән матур гына яшәп яталар.
85 яшен тутырган көннәрдә аны тәбрик итүчеләр күп була Питрәч төбәге башлыгы Шәйхулла Насыйбуллин, Апакай мәхәлләсе имам-хатибы Галимҗан хәзрәт, Питрәч мөхтәсибәте имам-мөхтәсибе Мансур хәзрәт, Халидә абыстай барысы да абыстайны зурлап тәбрик итә. Әминә апа аларга рәхмәтләрен әйтеп бетерә алмый.
Без Әминә абыстай янына килгән көнне аны тәбрик итәргә дип Питрәч төбәгенең элекке мөхтәсибе, бүгенге көндә Усак бистәсе имам-хатыйбы Вәгыйзь хәзрәт Мөхәммәтгата килгән иде. Ул Әминә абыстайны гомер бәйрәме белән тәбрик итеп, иңнәренә ап-ак шәл салды.
Без Әминә ханымга тагын озак елларга җитәрлек саулык-сәламәтлек телибез. Халкыбызга, яшь буынга иман нуры өләшеп, тугры юлга чакырып яшәүче Әминә абыстай кебекләр күп булсын иде. Әминә апаның гомере бушка узмаган. Аллага шөкер, аның юлын дәвам итүче балалары, оныклары бар.
