Лимон гына димәгез!

Кайсы гына хуҗабикәнең гомерендә бер тапкыр булса да кәстрүл яндырганы юк икән?
Бу очракта лимоннан да шәбрәк ярдәмчене таба алмассыз, мөгаен. Лимон көйгән кәстрүлне дә чистарта, өйдәге янган исне дә бетерә.
Ике лимонны үзегез теләгәнчә кисегез, аларны кәстрүл төбен капларлык итеп салыгыз.
Шуның өстенә су салыгыз, лимон кисәкләрен батырырга тырышмагыз, барыбер калкып чыгачаклар. Кәстрүлне утка куегыз.
Су кайнап чыккач, бераз ныклап кайнап алсын. Аннары суытыгыз, лимон кисәкләрен алып ташлагыз. Кәстрүлне щетка белән җайлап кына чистартып алыгыз. Аннан соң салкын суда чайкагыз.
Кадерле хуҗабикәләр, киңәшебезне тыңлап, шулай эшләп карагыз әле, үз күзегезгә үзегез ышанмассыз!

Чыганак: https://intertat.tatar

Фото: https://pixabay.com