Акциядә әтиләр советы катнашты. Иң активларга грамота тапшырдылар
Акция кысаларында “Каенкай” балалар бакчасында тәрбияләнүчеләр ата-аналар белән бергә берсеннән-берсе матур җимлекләр ясадылар. Аларны мәктәпкәчә учреждение янында үсә торган агачларга элделәр.
- Без буш вакыт табып, кошлар өчен җимлекләр ясарга тырыштык. Ял көннәрендә өч атна ясадык. Улым бу процесста актив катнашты, миңа эш коралларын, такталарны биреп торды, бергәләп буядык, – дип уртаклашты ике яшьлек Ризванның әтисе Илнар Җаббаров.
Җаббаровлар җимлеге агачтан, икенче катнашучы Ирада Хаҗиеваныкы кәгазьдән иде. Бу баллы ризык тартмасы, ул бушагач, кәгазен ташламадык, ә аны файдалы эш өчен кулланырга булдык.Өстәвенә әле аңа кар бөртеге сурәтләнгән.
– Без кырыйларын ябыштырдык, бау ясадык, кош кереп ашый алсын өчен, уртасына түгәрәк кисеп алдык, - дип сөйләде үзенең җимлеге турында Ирада.
- Ә сиңа кем ярдәм итте? – дип кыздан сорадым.
- Мин бакчада булганда, аны әтием ясап куйган! - диде ул сөенеп.
“Каенкай” янындагы агачларга унга якын җимлек элеп куйганнар, аларга кошлар өчен ип валчыклары салганнар. Балалар саф һавага чыкканда яки бакчадан кайтканда, һичшиксез,җимлекләргә кошлар килүен, җимне ашау-ашамауларын тикшерәчәкбез, ашаган булсалар тагын ипи өстәячәкбез дип вәгъдә иттеләр.